سابق وزیر اعظم سید یوسف رضا گیلانی سے امریکی سفیر ڈونلڈ بلوم کی ملاقات کی
تفصیلات کے مطابق امریکی سفیر ڈونلڈ بلوم کی ملتان میں سابق وزیراعظم سید یوسف رضا گیلانی کی رہائش گاہ آمد ،ملاقات کے دوران دونوں راہنماﺅں نے پاکستان کی سیاسی و معاشی صورتحال خاص طور پر عام انتخابات کی تیاریوں کے حوالے سے تبادلہ خیال کیا ۔
سید یوسف رضا گیلانی نے ملاقات کے دوران پاکستان اور امریکہ کے درمیان پائیدار تعلقات کو مضبوط بنانے پر تبادلہ خیال کیا اور امریکہ اور پاکستان کے درمیان دوطرفہ تعلقات کو بڑھانے کی خواہش کا اظہار کیا اس موقع پر انہوں نے علاقائی امن کے لیے پاکستان کے عزم، اقتصادی تعلقات اور الیکشن 2024 میں جنوبی پنجاب کے سیاسی منظر نامے سے متعلق تفصیلی بات چیت کی۔
امریکی سفیر اور یوسف رضا گیلانی نے تجارت، معیشت، موسمیاتی تغیر، سلامتی اور علاقائی استحکام سمیت دوطرفہ دلچسپی کے مختلف موضوعات پر بات چیت کی.سابق وزیراعظم یوسف رضا گیلانی نے زور دیا کہ سیاسی استحکام سے ہی معاشی استحکام حاصل کیا جا سکتا ہے۔
اس موقع پر سابق وزیراعظم یعسف رضا گیلانی نے اسرائیلی بمباری کے نتیجے میں بے گناہ فلسطینیوں کی بے رحمانہ شہادتوں کے مسئلے کو اجاگر کیا اور غزہ میں فوری جنگ بندی کا مطالبہ کیا۔ انہوں نے لڑائی اور ہلاکتوں کے سلسلے کو فوری روکنے کا مطالبہ کیا اور غزہ کے لوگوں کو فی الفور طبی اورانسانی امداد کی فراہمی پر زور دیا۔
اس موقع پر جنوبی پنجاب کی مختلف سیاسی جماعتوں کے نمائندوں نے امریکی سفیر سے ملاقات کی جس میں سابق گورنر پنجاب ملک محمد رفیق رجوانہ، سابق وزیر اعلیٰ پنجاب سردار دوست محمد خان کھوسہ شامل تھے.
