ایکس کا پبلک لائیکس کے آپشن کو ختم کرنے کا فیصلہ
اردو انٹرنیشنل (مانیٹرنگ ڈیسک) ایلون مسک کی زیر ملکیت سوشل میڈیا پلیٹ فارم ایکس (ٹویٹر) میں ایک اور تبدیلی کی جا رہی ہے۔
ایکس میں پبلک لائیکس کے آپشن کو ختم کیا جا رہا ہے۔
پبلک لائیکس سے مراد صارف کے پروفائل پیج میں موجود وہ سیکشن ہے جس میں ان تمام پوسٹس کا ریکارڈ ہوتا ہے جو آپ نے لائیک کی ہوتی ہیں۔
ایکس کے ایک عہدیدار نے اعلان کیا کہ سوشل میڈیا پلیٹ فارم میں پبلک لائیکس کو پرائیویٹ کیا جا رہا ہے۔
ایکس کے ڈائریکٹر آف انجینئرنگ Haofei Wang نے بتایا کہ سوشل میڈیا پلیٹ فارم میں صارفین کے پروفائل پیج سے پبلک لائیکس کو ہٹایا جا رہا ہے۔
اس تبدیلی کے بعد کوئی یہ نہیں جان سکے گا کہ آپ نے دیگر صارفین کی کونسی پوسٹس کو لائیک کیا۔
انہوں نے ایک ایکس پوسٹ کا جواب دیتے ہوئے بتایا کہ ہم لائیکس کو پرائیویٹ کر رہے ہیں، کیونکہ پبلک لائیکس کے باعث بیشتر افراد کسی پوسٹ کو لائیک کرنے سے گھبراتے ہیں۔
انہوں نے مزید بتایا کہ بہت جلد صارفین کسی پریشانی کے بغیر اپنے پسندیدہ مواد کو لائیک کر سکیں گے۔
اس پوسٹ کو ایلون مسک نے بھی لائیک کیا جو ان کے پروفائل پیج کے پبلک لائیکس سے معلوم ہوا۔
ایکس کی جانب سے پہلے ہی پریمیئم صارفین کو پبلک لائیکس چھپانے کا آپشن فراہم کیا جاچکا ہے مگر اب یہ فیچر تمام صارفین کے لیے متعارف کرایا جارہا ہے۔
یہ نئی تبدیلی ایلون مسک کے اس تصور سے مطابقت رکھتی ہے جس کے تحت وہ ایکس میں لائیکس کے آپشن کو ہی ختم کر دینا چاہتے ہیں۔
کچھ عرصے پہلے انہوں نے بتایا کہ وہ ایکس میں لائیکس اور ری پوسٹ کاؤنٹ کو چھپانے کے خواہشمند ہیں۔
ابھی یہ تبدیلی تو نہیں ہوئی مگر ایلون مسک کے مطابق ایسا بہت جلد ہوگا۔
جب پبلک لائیکس کو پرائیویٹ کر دیا جائے تو بھی صارف یہ ضرور دیکھ سکے گا کہ اس نے کونسی پوسٹس کو لائیک کیا۔
فی الحال ایکس میں لائیک کاؤنٹ اور ریپلائیز کی تعداد کو پرائیویٹ نہیں کیا جا رہا۔
