اردو انٹرنیشنل (مانیٹرنگ ڈیسک) وادی تیراہ اور چترال سمیت دیگر مقامات پر شدید برف باری کے بعد قدرتی حسن نکھر آیا۔
ذرائع کے مطابق وادی تیراہ میں برف باری کے بعد ہر جانب درختوں، گھروں، پہاڑوں نے سفید چادر اوڑھ لی ہے جب کہ موسم کی شدت میں بھی اضافہ ہوگیا ہے۔
مقامی ذرائع ے مطابق شدید برف باری کی وجہ سے لنک روڈ بند ہونے سے مقامی آبادی مشکلات کا شکار ہے اور سردی بڑھنے سے روز مرہ کے معمولات متاثر ہو ہو رہے ہیں۔
علاوہ ازیں برف باری کے خوبصورت فطری مناظر دیکھنے کے لیے سیاحوں کی آمد کا سلسلہ بھی جاری ہے۔
دوسری جانب چترال شہر اور مضافات نے بھی برف کی سفید چادر اوڑھ لی ہے اورلوئر چترال کے کالاش ویلیز ، گرم چشمہ ، شیشی کوہ ، گولین میں 6سے 8 انچ تک برف پڑی ہے ۔ چترال شہر میں 4 انچ، آیون میں 2 انچ برف پڑ چکی ہے۔ اسی طرح لواری ٹنل ایریا میں مسلسل برفباری ہو رہی ہے اور اب تک ایک فٹ تک برف پڑ چکی ہے۔
برفباری سے سردی کی شدت بڑھ گئی ہے اور لوگ گھروں تک محدود ہوکر رہ گئے ہیں۔ اسی طرح سردی کی وجہ سے جلانے کی لکڑی کی قیمت میں بدستور اضافہ ہو گیا ہے اور فروخت کرنے والے منہ مانگی قیمت وصول کررہے ہیں۔
دوسری جانب خیبر پختون خوا کے بالائی اور میدانی علاقوں میں آئندہ 24 گھنٹوں کے دوران موسم خشک رہے گا۔ محکمہ موسمیات کے مطابق گزشتہ رات پشاور میں ہلکی بارش سے خشک سردی میں کمی آئی ہے جب کہ بعض بالائی علاقوں میں برف باری کی بھی اطلاعات موصول ہوئی ہیں۔ آئندہ ہفتے سے موسم سرما کی بارشوں اور پہاڑوں پر برف پڑنے کے کافی امکانات ہیں۔
