متحدہ عرب امارات میں بارش کا سلسلہ تھم گیا، موسمی الرٹ ختم
اردو انٹرنیشنل (مانیٹرنگ ڈیسک) متحدہ عرب امارات میں طوفانی بارشوں کا سلسہ تھم گیا جبکہ اماراتی حکومت نے موسمی الرٹ کے خاتمے کا اعلان کردیا، تاہم سیلابی صورتحال کے بعد وقفے وقفے سے نظام زندگی معمول پر آنے لگی۔
خبر رساں ادارے اے ایف پی کے مطابق دنیا کے مصروف ترین بین الاقوامی مرکز دبئی ایئرپورٹ میں آپریشن معطل ہوگیا اور گزشتہ 2 روز کے دوران ایک ہزار 244 پروازیں منسوخ ہوگئیں جب کہ 41 پروازوں کا رخ موڑ دیا گیا۔
آج صبح ایئرپورٹ کی جانب سے جاری بیان میں کہا گیا کہ وقفے وقفے سے آپریشن دوبارہ شروع کردیا گیا ہے لیکن اب بھی کچھ پروازیں بدستور تاخیر اور خلل کا شکار ہیں۔
2 روز سے طوفانی ہواؤں کے ساتھ ہونے والی بارش کے باعث متحدہ عرب امارات میں ایک جبکہ عمان میں 20 افراد ہلاک ہوئے۔
متحدہ عرب امارات میں دو روز سے مسلسل ہونے والی بارش کے باعث گزشتہ 75 سالہ ریکارڈ ٹوٹ گیا، حکام نے سرکاری ملازمین اور طلباء کو ہدایت جاری کیں کہ وہ گھروں میں رہیں جب تک کہ سڑکوں سے پانی مکمل طور پر صاف نہیں ہوجاتا۔
اس کے علاوہ دبئی ٹرام اور میٹرو سروس مکمل بحال ہونا شروع ہوگئے ہیں، جب کہ دبئی کی سب سے بڑی ہائی وے شیخ زاید پر ٹریفک کی بڑی حد تک روانی بحال ہوگئی ہے۔
مختلف علاقوں سے بارش کے پانی کی نکاسی کے لیے کام جاری ہے اور متعدد شاہراہوں کو ٹریفک کےلیے کھول دیاگیا ہے۔
شارجہ کے متعدد علاقوں میں اشیائے خورو نوش کی سپر اسٹورز تک ترسیل تاحال معطل ہے، شارجہ اور عمان میں پانی کی نکاسی کی کوششیں جاری ہیں اور شہریوں کو غیر ضروری سفر سے گریز کا مشورہ دیا گیا ہے۔
دبئی سمیت دیگر ریاستوں میں آج اور کل بھی اسکولز اور تعلیمی ادارے بند رہیں گے،حکام نے تعلیمی اداروں کو آن لائن کلاسز کے اہتمام کی ہدایت کی ہے۔
