موٹر وے ایم 2 پر کار سے 3 خواتین سمیت چار افراد کی لاشیں برآمد
اردو انٹرنیشنل (مانیٹرنگ ڈیسک) لاہور۔اسلام آباد موٹروے پر پولیس کو بھیرہ کے قریب کھڑی گاڑی سے پانچ افراد نیم بے ہوش حالت میں ملے، جنہیں علاج کے غرض سے قریبی ہسپتال پہنچایا گیا، تاہم ان میں سے چار افراد دوران علاج چل بسے۔
ترجمان موٹر وے پولیس نے بتایا کہ تمام افراد کو طبی امداد فراہم کرنے کے لیے فوری طور پر تحصیل ہیڈ کوارٹر ہسپتال بھیرہ لے جایا گیا جہاں دوران علاج چار افراد دم توڑ گئے اور ایک تاحال مریض بے ہوش ہے۔
ترجمان کے مطابق دوران پیٹرولنگ موٹروے پولیس کو اطلاع ملی کہ ایک گاڑی سڑک کے کنارے کھڑی ہے، موٹروے پولیس جب گاڑی کے قریب پہنچی تو گاڑی میں پانچ افراد نیم بے ہوشی کی حالت میں موجود تھے۔
ریسکیو ذرائع کے مطابق متاثرہ فیملی میکلوڈ روڈ لاہور کی رہائشی بتائی گئی ہے اور ان تمام کا افراد کا تعلق ایک ہی خاندان سے ہے۔ یہ افراد لاہور سے اسلام آباد کی جانب سفر کر رہے تھے۔ جاں بحق افراد کی شناخت 25 سالہ ثمر، 55 سالہ رومیلہ، 30 سالہ مہر اور تین سالہ بچہ عون علی کے نام سے ہوئی ہے۔
کار سوار فیملی کے چار افراد کی موت کی وجہ تا حال معلوم نہیں ہو سکی۔ ڈاکٹروں کے مطابق اموات کی وجہ زہر خورانی ہو سکتی ہے۔
موٹروے پولیس کے مطابق پولیس اسٹیشن پھلروان کا عملہ بھی ہسپتال پہنچ گیا اور تفتیش کا آغاز کر دیا گیا ہے۔ ریسکیو ذرائع کے مطابق موٹروے ایم ٹو پر بھیرہ کے قریب کھڑی گاڑی میں فیملی کی تین خواتین سمیت چار افراد جاں بحق ہوئے جبکہ ڈرائیور بے ہوش ہے
