اردو انٹرنیشنل اسپورٹس ویب ڈیسک تفصیلات کے مطابق فائقہ ریاض وائلڈ کارڈ پر پیرس اولمپکس میں شرکت کریں گی لیکن پاکستان اسپورٹس بورڈ (پی ایس بی ) یا فیڈریشن کی جانب سے کوئی کیمپ نہیں لگایا گیا ہے ، نہ ہی ٹریننگ کیلئے اسپرنٹر کو ذاتی کوچ کی سہولت میسر ہے۔یہی وجہ ہے کہ اسپرنٹرفائقہ ریاض ان دنوں پنجاب اسٹیڈیم میں شام کے سیشن میں 2 گھنٹےاکیلے ٹریننگ کرتی ہیں۔
اس حوالے سے پی او اے کا کہنا ہے کہ ڈیپارٹمنٹ واپڈا کو کوچ مہیا کرنے کا کہا ہے، سیمی رضوی کوچ ہوں گی جبکہ طبی معاملے کے لیے ڈاکٹر میثاق رضوی کو ذمہ داری دی ہے۔
ادھر اسپرنٹر فائقہ ریاض نے کہا ہے کہ خوشی ہے کہ اللہ پاک نے اولمپکس میں پاکستان کی نمائندگی کرنے کا موقع دیا لیکن ذاتی کوچ کی سہولت میسر نہ ہونے پر مایوس ہوں، اولمپکس کیلئے ٹریننگ کر رہی ہوں کوشش ہے کہ اچھاپرفارم کروں ۔
فائقہ ریاض نے درخواست کی کہ ٹریننگ کےدوران مجھےذاتی کوچ کی سہولت دی جائے،اولمپکس کیلئے دن کم ہیں، کوچ کے آنے سے میری تیاری اور اچھی ہوجائے گی۔
