ممکنہ مظاہروں سے قبل ریڈ زون کی سیکیورٹی سخت، شہریوں کو متبادل راستوں کی ہدایت

اردو انٹرنیشنل (مانیٹرنگ ڈیسک) ڈان نیوز کی خبر کے مطابق ممکنہ احتجاجی مظاہروں کے پیش نظر وفاقی دارالحکومت اسلام آباد کے حساس علاقے ریڈ زون میں سیکیورٹی سخت کر دی گئی ہے اور متعدد اہم داخلی راستے عارضی طور پر بند کر دیے گئے ہیں۔ پولیس حکام کے مطابق جمعہ کے روز سیکیورٹی خدشات کے باعث ریڈ زون جانے والے زیادہ تر راستے بند رکھے جائیں گے جبکہ چند مخصوص مقامات سے محدود داخلے کی اجازت ہوگی۔

اسلام آباد پولیس کے مطابق مارگلہ روڈ اور اسلام آباد میریئٹ ہوٹل کی جانب سے ریڈ زون میں داخلے کا راستہ کھلا رکھا گیا ہے، جبکہ دیگر داخلی راستوں کو بند کر دیا گیا ہے۔ اسی طرح فضلِ حق روڈ سے چائنا چوک کی جانب جانے والا راستہ بھی ٹریفک کے لیے بند رہے گا اور شہریوں کو متبادل طور پر جناح ایونیو استعمال کرنے کی ہدایت دی گئی ہے۔

جاری کیے گئے ٹریفک پلان کے مطابق پولی کلینک ہسپتال سے لال کوارٹر چوک جانے والی گاڑیوں کو لقمان حکیم روڈ کے ذریعے موڑا جائے گا جبکہ شہریوں کو متبادل راستے کے طور پر صدر روڈ استعمال کرنے کا مشورہ دیا گیا ہے۔ اسی طرح جی-6 سے ایف-6 جانے والے مسافروں کو چائنا چوک انڈر پاس یا سیونتھ ایونیو کے ذریعے جناح ایونیو کا راستہ اختیار کرنے کی ہدایت دی گئی ہے۔

پولیس حکام کے مطابق آبپارہ چوک سے سیرینا ہوٹل جانے والی ٹریفک کو بھی متبادل راستوں پر منتقل کیا جائے گا۔ اسی طرح کلب روڈ یا بارہ کہو سے آنے والے شہریوں کو کشمیر چوک، سرینگر ہائی وے، سیونتھ ایونیو اور مارگلہ روڈ استعمال کرنے کی ہدایت کی گئی ہے۔

پولیس کے مطابق ڈی چوک کی جانب جانے والی تمام سڑکیں بھی بند رکھی جائیں گی کیونکہ ممکنہ طور پر احتجاج جی-6 سے ڈی چوک تک کیا جا سکتا ہے۔

واضح رہے کہ اس ہفتے کے آغاز میں حافظ نعیم الرحمن، جوجماعت اسلامی پاکستان کے امیر ہیں، نے امریکا اور اسرائیل کی ایران کے خلاف کارروائیوں کے خلاف اور ایران سے اظہارِ یکجہتی کے لیے ملک بھر میں احتجاج کا اعلان کیا تھا۔