پنجاب اسمبلی میں توہین مذہب سے متعلق قرارداد منظور
اردو انٹرنیشنل (مانیٹرنگ ڈیسک) پنجاب اسمبلی نے توہین مذہب سے متعلق قرارداد متفقہ طور پر منظور کرلی۔
پنجاب اسمبلی کے اسپیکر ملک محمد احمد خان کا کہنا ہے کہ پے در پے واقعات چرچز اور توہین مذہب جیسے واقعات انتہائی تشویش ناک ہیں، حکومتی رکن راحیلہ خادم حسین نے مختلف توہین مذہب کے واقعات پر قرارداد ایوان میں پیش کی۔
قرارداد کے متن میں کہا گیا ہے کہ یہ ایوان اس بات پر مکمل یقین رکھتا ہے کہ حق زندگی سب سے زیادہ قابل احترام حق ہے جیسا کہ آئین پاکستان میں درج ہے اور پاکستان کا ہر شخص آئین کی نظر میں برابر ہے۔
متن کے مطابق یہ ایوان ہماری حالیہ موب لنچنگ کے واقعات کا سنجیدگی سے نوٹس لیتا ہے، اس بات پر تشویش کا اظہار کرتا ہے کہ حال ہی میں ملک کےمختلف علاقوں میں ایسے واقعات میں اضافہ ہوا ہے۔
متن میں یہ لکھا ہے کہ یہ ایوان ہولناک اور المناک واقعات کی شدید مذمت کرتا ہے، کسی بھی مہذب معاشرے میں یہ برداشت نہیں کیا جاسکتا اور یہ ایوان وفاقی اورصوبائی حکومت سے پرزور مطالبہ کرتا ہے کہ حکومتیں ہمارے تمام شہریوں کی حفاظت کو یقینی بنائیں۔
متن میں یہ بھی کہا گیا ہے کہ یہ ایوان وفاقی اور پنجاب کی حکومتوں سے بھی مطالبہ کرتا ہے کہ فوری طور پر تمام ضروری اقدامات کریں، توہین مذہب کے واقعات میں ملوث افراد کی نشاندہی کی جائے اور متعلقہ قوانین کے تحت تفتیش اور مقدمہ چلایا جائے۔
متن میں مزید لکھا ہے کہ عدالتیں انصاف کی فراہمی کو یقینی بنائیں، مذہب کے نام پر واقعات بہت بڑی برائی کی شکل اختیار کرتا جا رہا ہے۔
