پی ایس ایل کی افتتاحی تقریب منسوخ، میچز بغیر شائقین کے ہوں گے: محسن نقوی

پاکستان کرکٹ بورڈ (پی سی بی) کے چیئرمین محسن نقوی نے اعلان کیا ہے کہ پاکستان سپر لیگ (پی ایس ایل) کا آغاز 26 مارچ سے ہی ہوگا، تاہم ابتدائی میچز بغیر تماشائیوں کے کھیلے جائیں گے۔

لاہور میں پریس کانفرنس کرتے ہوئے انہوں نے بتایا کہ لیگ کے انعقاد سے متعلق کئی روز سے مشاورت جاری تھی، جس میں وزیر اعظم اور سیکیورٹی اداروں سے بھی تفصیلی تبادلہ خیال کیا گیا۔

موجودہ عالمی اور علاقائی صورتحال، خصوصاً مشرق وسطیٰ میں جاری کشیدگی کے پیش نظر یہ فیصلہ کیا گیا کہ شائقین کو تاحال اسٹیڈیم آنے کی اجازت نہیں دی جائے گی۔

چیئرمین پی سی بی کے مطابق پی ایس ایل کے میچز صرف لاہور اور کراچی میں ہوں گے جبکہ افتتاحی تقریب بھی منسوخ کر دی گئی ہے انہوں نے پشاور کے شائقین سے معذرت کرتے ہوئے یقین دہانی کرائی کہ آئندہ سیزن میں وہاں ایک سے زائد میچز رکھے جائیں گے۔

محسن نقوی نے مزید کہا کہ خریدے گئے ٹکٹ 72 گھنٹوں کے اندر واپس کروائے جا سکتے ہیں، جبکہ فرنچائزز کو ہونے والے مالی نقصان کا ازالہ پی سی بی کرے گا اور گیٹ منی بھی فرنچائزز کو دی جائے گی انہوں نے بتایا کہ کھلاڑیوں کی آمد کا سلسلہ آج رات اور کل سے شروع ہو جائے گا۔