پی سی بی کی جانب سے ویمنز سینٹرل کنٹریکٹ کا اعلان، نداڈار، عالیہ ریاض سمیت 6 کرکٹرز باہر
اردو انٹرنیشنل (اسپورٹس ڈیسک) پاکستان کرکٹ بورڈ (پی سی بی) نے اگلے بین الاقوامی سیزن کے لیے 16 خواتین کرکٹرز کو سینٹرل کنٹریکٹس دینے کا اعلان کردیا ہے، جس کا اطلاق یکم جولائی 2024 سے ہوگا۔
گزشتہ سال 20 کرکٹرز کو 2 سال کیلئے سینٹرل کنٹریکٹ دیئے گئے تھے جس میں کہا گیا تھا کہ 24-2023 کے سیزن کے بعد ان کی کارکردگی کا جائزہ لیا جائے گا۔
کپتان فاطمہ ثنا اور وکٹ کیپر بیٹر منیبہ علی کو اے کیٹگری میں ترقی دی گئی ہے جبکہ بائیں ہاتھ کی سپنر سعدیہ اقبال اپنی حالیہ عمدہ کارکردگی کی بنا پر بی کیٹگری میں جگہ بنانے میں کامیاب ہوئی ہیں۔
اس سینٹرل کنٹریکٹ میں 3 نئی انٹریز گل فیروزہ، رامین شمیم اور تسمیہ رباب شامل ہیں، تسمیہ رباب نے پہلی بار سینٹرل کنٹریکٹ حاصل کیا ہے جو ان کے کیریئر میں ایک اہم سنگ میل ہے، گل فیروزہ 2018 اور رامین شمیم 23-2022 کے بعد دوبارہ سینٹرل کنٹریکٹ حاصل کرنے میں کامیاب ہوئی ہیں۔
اسی طرح ندا ڈار، عالیہ ریاض، انوشے ناصر، ایمان فاطمہ، شوال ذوالفقار اور سدرہ نواز کے سینٹرل کنٹریکٹ کی تجدید نہیں کی گئی تاہم یہ تمام کھلاڑی سلیکشن کے لیے دستیاب رہیں گی۔
