پاکستان کی فضائی حدود محفوظ، ایتھوپیا کے آتش فشاں کی راکھ کا رخ بھارت کی طرف
اردو انٹرنیشنل (مانیٹرنگ ڈیسک) بھارت کے محکمہ موسمیات کے مطابق آتش فشانی راکھ کے اثرات دلی، گجرات، راجستھان، پنجاب اور ہریانہ تک محسوس کیے گئے
پاکستان کے محکمۂ موسمیات (پی ایم ڈی) نے کہا ہے کہ ملک کی فضائی حدود بالکل صاف ہیں اور ایتھوپیا میں 12 ہزار سال بعد پھٹنے والے “خاموش” آتش فشاں سے اُٹھنے والی راکھ کا ملک کے ماحول پر کوئی اثر نہیں پڑے گا۔ راکھ کا بادل اس وقت بھارت اور چین کی طرف بڑھ رہا ہے۔
میڈیا رپورٹس کے مطابق ایتھوپیا کے آتش فشاں نے اتوار کے روز پہلی بار پھٹ کر 14 کلومیٹر (8.7 میل) بلندی تک راکھ کے بادل اُڑا دیے۔
محکمۂ موسمیات کے ترجمان انجم نذیر نے جیو نیوز سے گفتگو میں بتایا کہ منگل کی صبح 10 بجے گوادر کے جنوب میں 45 ہزار فٹ کی بلندی پر آتش فشانی راکھ دیکھی گئی۔ ان کا کہنا تھا کہ یہ راکھ بحیرۂ عرب سے سندھ کے اوپر سے گزری مگرسندھ کی زمین پر اس کے کوئی اثرات نہیں پڑے۔
انجم نذیر کے مطابق آتش فشانی راکھ بھارت کی جانب بڑھ چکی ہے اور راجستھان کی طرف جائے گی، جب کہ راکھ کے بادل بھارت کی طرف واضح طور پر بڑھتے ہوئے دیکھے جا سکتے ہیں۔
انہوں نے مزید کہا کہ اس وقت پاکستان کی فضائی حدود بالکل صاف ہیں۔ ان کے مطابق آج صبح سے اومان، یمن اور پاکستان کے علاقے صاف ہو چکے ہیں۔
انہوں نے بتایا کہ راکھ 45 ہزار فٹ کی بلندی پر موجود تھی اس لیے نہ یہ پاکستان کے شمالی علاقوں کو متاثر کرے گی، نہ ماحول اور نہ ہی ملک کی فضائی آلودگی میں اضافہ کرے گی۔ نذیر نے یہ بھی واضح کیا کہ آتش فشانی راکھ عام سیٹلائٹ تصاویر میں نظر نہیں آتی۔
بھارت میں راکھ کا بادل، اب چین کی طرف بڑھ رہا ہے
بھارت کے محکمۂ موسمیات نے کہا ہے کہ ایتھوپیا کے آتش فشاں سے اُٹھنے والی راکھ کے اثرات دلی، گجرات، راجستھان، پنجاب اور ہریانہ تک محسوس کیے گئے ہیں۔
محکمے کے مطابق یہ راکھ کا بادل چین کی طرف بڑھ رہا ہے اور منگل کی شام 7:30 بجے تک بھارت سے نکل جائے گا۔
ایئر انڈیا نے بتایا کہ اس نے پیر اور منگل کے روز 11 پروازیں منسوخ کیں تاکہ ان طیاروں کی احتیاطی جانچ کی جا سکے جو آتش فشاں پھٹنے کے بعد متاثرہ علاقوں کے اوپر سے گزرے تھے۔ یہ اقدام بھارت کے ایوی ایشن ریگولیٹر کی ہدایت کے مطابق کیا گیا۔
بھارتی ایئرلائن اکاسا نے بھی اگلے دو دنوں کے لیے جدہ، کویت اور ابوظبی جیسے مشرقِ وسطیٰ کے مقامات کے لیے اپنی پروازیں منسوخ کر دیں۔
محکموں نے بتایا کہ ایتھوپیا میں 12 ہزار سال بعد پھٹنے والے خاموش آتش فشاں نے خطے کے مختلف حصوں تک راکھ پھیلا دی ہے، لیکن پاکستان کے محکمۂ موسمیات کے مطابق اس کا پاکستان کی زمین، ماحول یا فضائی معیار پر کوئی اثر نہیں ہوا۔
