پاکستان آرمی نے برطانیہ میں ہونے والی کیمبریئن پیٹرول 2025 میں گولڈ میڈل جیت لیا
اردو انٹرنیشنل (مانیٹرنگ ڈیسک) کیپٹن محمد سعد کی قیادت میں ٹیم نے 36 ممالک کی 137 ٹیموں کو پیچھے چھوڑ دیا۔پاکستان آرمی نے ویلز، برطانیہ میں ہونے والی مشہور و معروف ایکسسرسائز کیمبریئن پیٹرول 2025 میں گولڈ میڈل جیت کر ایک اور تاریخ کامیابی حاصل کی ہے۔
کیپٹن محمد سعد کی قیادت میں پاکستانی ٹیم نے دنیا کے 36 ممالک کی 137 ٹیموں میں سب سے بہترین کارکردگی دکھائی۔
آئی ایس پی آر کے مطابق یہ مشق 3 سے 13 اکتوبر تک ویلز میں منعقد ہوئی۔ یہ اس مقابلے کا 66واں ایڈیشن تھا، جسے دنیا کی سب سے مشکل اور پیشہ ورانہ فوجی مشقوں میں سے ایک سمجھا جاتا ہے۔
ساٹھ (60) کلومیٹر کا دشوار سفر
شرکاء کو 48 گھنٹوں میں 60 کلومیٹر کا فاصلہ طے کرنا ہوتا ہے،وہ بھی نہایت سخت اور پہاڑی علاقے سے گزرتے ہوئے۔ دورانِ سفر ٹیموں کو مختلف تاکتیکی اور تکنیکی مشنز مکمل کرنے ہوتے ہیں بالکل جنگی حالات کی نقل میں۔
پاکستانی ٹیم کی شاندار کارکردگی
ایک سو سینتیس (137 ) بین الاقوامی ٹیموں میں سے پاکستان آرمی کی ٹیم نے غیر معمولی حوصلہ، قیادت اور ہم آہنگی کا مظاہرہ کیا اور گولڈ میڈل اپنے نام کیا۔
آئی ایس پی آر نے اس کامیابی کو پاکستان آرمی کی پیشہ ورانہ مہارت اور لگن کا مظہر قرار دیا۔ترجمان کے مطابق یہ کامیابی پوری قوم کے لیے فخر کا باعث ہے۔ پاکستان آرمی اپنے اعلیٰ تربیتی معیار، نظم و ضبط، اور عزم و ہمت کے باعث دنیا بھر میں ممتاز مقام رکھتی ہے۔
کیمبریئن پیٹرول — فوجی دنیا کے اولمپکس
کیمبریئن پیٹرول ایک سالانہ فوجی مشق ہے جو برطانوی فوج کی جانب سے ویلز میں منعقد کی جاتی ہے۔ اس کا مقصد سپاہیوں کی جسمانی برداشت، تاکتیکی منصوبہ بندی، ٹیم ورک اور مشکل حالات میں کارکردگی کو آزمانا ہے۔
اس مقابلے کو اکثر “فوجی پیٹرولنگ کے اولمپکس” کہا جاتا ہے، کیونکہ یہ دنیا بھر کی اعلیٰ فوجی ٹیموں کو اپنی کارکردگی دکھانے کا موقع فراہم کرتا ہے۔
پاکستان آرمی نے ماضی میں بھی اس مقابلے میں شاندار کارکردگی دکھائی ہے اور کئی بار اعلیٰ اعزازات حاصل کیے ہیں۔
اس سال کا گولڈ میڈل ایک بار پھر اس کی پیشہ ورانہ تربیت اور عالمی معیار کی تصدیق کرتا ہے۔
آئی ایس پی آر نے مزید کہا پاکستان آرمی ہمیشہ قومی پرچم کو بلند رکھتی آئی ہے، اور آئندہ بھی قوم کا فخر بننے کے لیے اپنی پوری توانائیاں صرف کرتی رہے گی۔
