آج کوئی اقتدار میں آنے کی خواہش نہیں رکھتا، الیکشن انوکھا تھا گوگل بھی حیران تھا کہ رزلٹ کیا ہیں،شاہد خاقان

آج کوئی اقتدار میں آنے کی خواہش نہیں رکھتا، الیکشن انوکھا تھا گوگل بھی حیران تھا کہ رزلٹ کیا ہیں،شاہد خاقان

اردو انٹرنیشنل (مانیٹرنگ ڈیسک) کراچی، نیب کورٹ کے باہر میڈیا سے گفتگو کرتے ہوئے سابق وزیراعظم و سینئر سیاسی رہنماءشاہد خاقان عباسی کا کہنا ہے کہ موجودہ الیکشن انوکھا تھا گوگل بھی حیران تھا کہ رزلٹ کیا ہیں. انہوں نے کہا کہ انوکھی بات ہے کہ آج کوئی اقتدار میں آنے کی خواہش نہیں رکھتا.

سابق وزیراعظم نے کہا کہ موجودہ انتخابات میں فارم 47 فارم 45 سے جیت گیا، یہ الیکشن کمیشن کا کمال ہے کہ فارم 47 فارم 45 سے پہلے بن گیا تھا۔

انہوں نے کہا کہ الیکشن کے بعد ہر سیاسی پارٹی یہی بات کر رہی ہے کہ مجھے اقتدار دیدیں میں سب ٹھیک کر دونگا۔سیاست تو اقتدار کیلئے ہوتی ہے، آج ہر صورت میں اقتدار حاصل کرنے کی کوشش میں ہیں، یہ چیزیں ملک اور قوم کا نقصان کرتی ہیں، مولانا صاحب پی ڈی ایم کے سربراہ ہیں، میرا نہیں خیال کہ مولانا صاحب نے پی ڈی ایم کو الوداع کہا ہے۔

شاہد خاقان عباسی نے مزید کہا کہ میں نے یہ کبھی نہیں کہا کہ الیکشن مت کرائیں،آج الیکشن کوئی رزلٹ نہیں دے پائے نہ مسائل کا حل دے پائیں گے، تمام لوگ اقتدار کی سیاست سے باہر نکلیں تب ہی حل نکل پائے گا، میں تو اللہ کا شکر ادا کرتا ہوں اس خرابی میں حصہ لینے سے بچ گیا۔

سابق وزیراعظم کا کہنا تھا میں ان انتخابات کو ملک میں خرابی کا سبب سمجھتا ہوں، اقتدار کو ایک طرف کردیں، یہ سب جانتے ہیں آج اقتدار کا کوئی مستحق نہیں،آج مسئلہ ملک ہے، پوری الیکشن مہم میں مسائل کے حل کی بات کہاں ہوئی ہے؟۔میڈیا کے سوالات کا جواب دیتے ہوئے شاہد خاقان عباسی نے کہا ہے کہ نیب کے حوالے سے میراکہنا ہے کہ معاملہ 6 سال سے جاری ہے، ہم با ر بار پوچھتے ہیں جرم کیا ہے، اب چوتھی حکومت بھی آرہی ہے، امید ہے جلدی بن جائے گی، انہوں نے وعدہ کیا ہے نیب کو ختم کردیں گے، آپ عدالتوں میں جاکر حیران ہوجائیں گے کہ لوگوں کے ساتھ کیا کیا ظلم ہوا۔