History made as T20 World Cup sets new record with four centuries-AFP
بھارت اور سری لنکا کی میزبانی میں جاری ٹی 20 ورلڈ کپ میں بیٹرز نے نیا سنگِ میل عبور کرلیا ہے ایونٹ میں اب تک چار سنچریاں اسکور کی جاچکی ہیں، جو کسی ایک ٹی ٹوئنٹی ورلڈکپ ایڈیشن میں سب سے زیادہ ہیں۔
سری لنکا کے اوپنر پتھم نسانکا نے آسٹریلیا کے خلاف شاندار سنچری اسکور کرکے ایونٹ میں پہلی تین ہندسوں کی اننگز کھیلی، جبکہ کینیڈا کے یوراج سمرا نے نیوزی لینڈ کے خلاف سنچری بنا کر مجموعی تعداد دو کردی۔
بعدازاں پاکستان کے صاحبزادہ فرحان نے نمیبیا کے خلاف سنچری اسکور کرکے ایک ایڈیشن میں تین سنچریوں کا نیا ریکارڈ قائم کیا سپر ایٹ مرحلے میں انگلینڈ کے کپتان ہیری بروک نے پاکستان کے خلاف شاندار سنچری جڑ کر مجموعی تعداد چار تک پہنچا دی۔
واضح رہے کہ اس سے قبل کسی بھی ٹی ٹوئنٹی ورلڈکپ ایڈیشن میں دو سے زائد سنچریاں نہیں بنی تھیں 2007 کے ابتدائی ایڈیشن میں ایک سنچری بنی، 2009 میں کوئی بیٹر تین ہندسوں تک نہ پہنچ سکا۔
2010 میں دو، 2012 میں ایک، جبکہ 2014 اور 2016 میں دو، دو سنچریاں اسکور ہوئیں 2021 میں ایک، 2022 میں دو سنچریاں بنیں جبکہ 2024 کے ایڈیشن میں کوئی سنچری نہ بن سکی تھی۔
