مشرقِ وسطیٰ کشیدگی: فیلڈ مارشل عاصم منیر کی سعودی وزیر دفاع سے اہم ملاقات، ایران کے حملوں پر تشویش

اردو انٹرنیشنل (مانیٹرنگ ڈیسک) ڈان نیوز کی خبر کے مطابق چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر نے سعودی عرب میں سعودی وزیر دفاع شہزادہ خالد بن سلمان سے ملاقات کی جس میں مشرقِ وسطیٰ میں جاری کشیدگی اور سعودی عرب پر ایران کے حالیہ حملوں سمیت خطے کی سکیورٹی صورتحال پر تفصیلی تبادلہ خیال کیا گیا۔

سعودی وزیر دفاع نے سوشل میڈیا پلیٹ فارم ایکس پر جاری بیان میں کہا کہ ملاقات کے دوران ایران کی جانب سے مملکت پر کیے جانے والے میزائل اور ڈرون حملوں اور ان سے نمٹنے کے اقدامات پر بات چیت ہوئی۔ ان کے مطابق یہ گفتگو پاکستان اور سعودی عرب کے درمیان موجود اسٹریٹجک دفاعی تعاون کے تناظر میں کی گئی۔

خالد بن سلمان کا کہنا تھا کہ ایسے حملے خطے کے امن اور استحکام کے لیے خطرہ ہیں۔ انہوں نے ایران پر زور دیا کہ وہ دانشمندی کا مظاہرہ کرے اور کسی بھی غلط اندازے سے گریز کرے۔

گزشتہ سال ستمبر میں وزیراعظم شہباز شریف اور سعودی ولی عہد محمد بن سلمان نے ریاض میں اسٹریٹجک باہمی دفاعی معاہدے پر دستخط کیے تھے جس کے تحت کسی ایک ملک پر حملہ دونوں کے خلاف جارحیت تصور کیا جائے گا۔

 نائب وزیراعظم اور وزیر خارجہ اسحاق ڈار نے حال ہی میں کہا تھا کہ پاکستان کی سفارتی کوششوں نے موجودہ علاقائی بحران کے دوران سعودی عرب پر ممکنہ مزید بڑے ایرانی حملوں کو روکنے میں مدد دی۔