اسامہ میر سے 8 لاکھ درہم کا مبینہ فراڈ، قانونی کارروائی کا اعلان

قومی لیگ اسپنر اسامہ میر نے اپنے ساتھ ہونے والے مبینہ فراڈ پر کھل کر بات کرتے ہوئے قانونی کارروائی کا اعلان کر دیا ہے۔

جیو نیوز سے گفتگو میں انہوں نے بتایا کہ عبدالرحمان نامی شخص نے سرمایہ کاری کے نام پر ان سے تقریباً 8 لاکھ درہم حاصل کیے، تاہم معاہدے کے مطابق نہ منافع دیا گیا اور نہ ہی اصل رقم واپس کی گئی۔

اسامہ میر کے مطابق گارنٹی کے طور پر دیے گئے پلاٹس کے کاغذات بھی جعلی ثابت ہوئے، جبکہ متعدد بار رابطے اور وعدوں کے باوجود مسئلہ حل نہیں ہوا۔

انہوں نے کہا کہ سیالکوٹ واپسی پر وہ اس معاملے کو ہر قانونی فورم پر لے جائیں گے اور متعلقہ اداروں سے تعاون کی اپیل بھی کی ہے ذرائع کے مطابق اسی نوعیت کے فراڈ میں دیگر کرکٹرز بھی متاثر ہوئے ہیں، تاہم اکثر کھلاڑی معاملہ منظرعام پر لانے سے گریزاں ہیں۔