کوہاٹ: پولیس چیک پوسٹ پر دہشتگردوں کا حملہ، 3 اہلکاروں سمیت 4 افراد جاں بحق
دہشتگردوں نے رات گئے انڈس ہائی وے لاچی ٹول پلازہ اور چیک پوسٹ پر حملہ کر دیا۔
حملے میں شہید ہونے والے اہلکاروں کی شناخت ہیڈ کانسٹیبل امجد، ہیڈ کانسٹیبل جنید اور کانسٹیبل وقار کے نام سے ہوئی جبکہ لکی مروت کا رہائشی عام شہری نور محمد بھی حملے میں شہید ہو گیا.
ترجمان پولیس فضل نعیم نے بتایا کہ پولیس چیک پوسٹ پر دہشتگردوں نے رات کے وقت بھاری ہتھیاروں سے اہلکاروں پر حملہ کیا، حملے اور فائرنگ کے تبادلے میں 3 پولیس اہلکار اور ایک عام شہری بھی جاں بحق ہوگیا۔
ترجمان پولیس کے مطابق واقعے کی اطلاع پر پولیس کی بھاری نفری جائے وقوع پر پہنچ گئی، علاقے کو گھیرے میں لے کر سرچ آپریشن شروع کردیا گیا ہے۔
پولیس کا کہنا ہے کہ حملہ آور پہاڑی علاقے کے قریب ہی چھپے ہوئے ہیں، جلد ان کا خاتمہ کردیا جائے گا۔
