اردو انٹرنیشنل (مانیٹرنگ ڈیسک) اسرائیل نے پہلی بار عوامی سطح پر فلسطینی مزاحمتی تنظیم حماس کے سربراہ اسماعیل ہنیہ کو قتل کرنے کا اعتراف کر لیا۔
عرب میڈیا کے مطابق اسرائیلی وزیرِ دفاع اسرائیل کاٹز نے کہا ہے کہ حوثیوں کو واضح پیغام دینا چاہتا ہوں۔
اسرائیل کاٹز کا کہنا ہے کہ ہم نے حماس کو شکست دی ہے، ہم نے حزب اللّٰہ کو شکست دی ہے، ہم نے ایران کے دفاعی اور پیداواری نظام کو نقصان پہنچایا ہے۔
انہوں نے کہا کہ ہم نے شام میں بشار الاسد کی حکومت کو گرا دیا ہے، حوثیوں کے اسٹریٹجک انفرا اسٹرکچر کو نقصان پہنچائیں گے۔
اسرائیلی وزیرِ دفاع کا کہنا ہے کہ حوثی رہنماؤں کے ساتھ بھی وہی کریں گے جو ہم اسماعیل ہنیہ، سنوار اور نصراللّٰہ کے ساتھ کیا۔
واضح رہے کہ فلسطینی مزاحمتی تنظیم حماس کے سربراہ اسماعیل ہنیہ جنہیں تہران میں ایران کے صدر کی حلف برداری کی تقریب کے بعد 31 جولائی کو قتل کیا گیا تھا۔
2006ء میں اسماعیل ہنیہ نے حماس کو فلسطین میں ایک انتخابی کامیابی دلائی اور بعد میں حماس کے سیاسی چیف کے طور پر سفارتی کوششوں کی قیادت کی تھی۔
11 اپریل 2024ء کو عید کے دن اسماعیل ہنیہ کے 3 بیٹے اور 4 پوتے پوتیاں اسرائیلی حملے میں جان بحق ہوگئے تھے۔
