بھارتی ایتھلیٹ نیرج چوپڑا شادی کے بندھن میں بندھ گئے

اردو انٹرنیشنل (اسپورٹس ویب ڈیسک) تفصیلات کے مطابق بھارت کے جیولین تھرو ایتھلیٹ نیرج چوپڑا شادی کے بندھن میں بندھ گئے۔ بھارتی میڈیا رپورٹس کے مطابق بھارت کے معروف جیولن تھرو ایتھلیٹ اور دو بار کے اولمپک میڈلسٹ نیرج چوپڑا نے اپنی شادی کا اعلان فوٹوا ینڈ ویڈیو شیئرنگ ایپ انسٹاگرام پر اپنے آفیشل اکاؤنٹ سے کیا۔

اپنے مداحوں کو شادی کی اطلاع دیتے ہوئے انہوں نے اپنی پوسٹ کے کیپشن میں لکھا کہ “نیرج (دل کا ایموجی) ہیمانی، محبت کے بندھن میں بندھے۔”

اگرچہ پوسٹ میں شادی کی زیادہ تفصیلات نہیں دی گئیں لیکن نیرج کے اس اعلان نے ان کے مداحوں کو ورطہ حیرت میں ڈال دیا ہے کیونکہ ایتھلیٹ اپنی نجی زندگی کی تشہیر سوشل میڈیا پر نہیں کرتے۔

بھارتی میڈیا کے مطابق نیرج چوپڑا کی اہلیہ کا نام ہیمانی مور ہے اور ان کا تعلق بھارتی ریاست ہریانہ کے ضلع سونی پت سے ہے۔