سعودی ولی عہد شہزادہ محمد بن سلمان سے ایرانی وزیر خارجہ کی اہم ملاقات
اردو انٹرنیشنل (مانیٹرنگ ڈیسک) سعودی عرب اور ایران کے سفارتی تعلقات میں اہم پیشرفت، سعودی ولی عہد شہزادہ محمد بن سلمان سے ایرانی وزیر خارجہ عباس عراقچی کی ملاقات ہوئی۔
ملاقات کے دوران سعودی عرب اور ایران کے دوطرفہ تعلقات کا جائزہ لیا گیا، خطے کی صورتحال اور اس حوالے سے کی جانے والی کوششوں پر بھی تبادلہ خیال کیا گیا، ایرانی وزیر خارجہ نے سعودی عرب کے دورے میں لبنان اور غزہ پر تبادلہ خیال کیا۔
دونوں رہنماؤں کی ملاقات کے موقع پر سعودی وزیر دفاع خالد بن سلمان، وزیرخارجہ فیصل بن فرحان، وزیرمملکت، کابینہ رکن اور قومی سلامتی کے مشیر ڈاکٹر موسعید بن محمد علی عائیبان بھی شریک تھے اور ایرانی وزیر خارجہ کے ہمراہ سعودی عرب میں ایرانی سفیر علی رضا عنایتی اور ایرانی وزارت خارجہ کے سینئر عہدیدار بھی موجود تھے۔
اس سے قبل شہزاد ہ فیصل بن فرحان سے ایرانی ہم منصب کی ملاقات ہوئی، ملاقات میں سعودی عرب اور ایران کے تعلقات اور مختلف شعبوں میں تعاون پر تبادلہ خیال کیا گیا۔
یاد رہے کہ سعودی عرب اور ایران کے درمیان حالیہ برسوں میں تعلقات میں کسی حد تک بہتری آئی ہے اور اس کے وجہ سے خطے میں کشیدگی بھی کم ہوئی جبکہ اس سے قبل دونوں ممالک کے درمیان تعلقات انتہائی کشیدہ ہوگئے تھے اور اس کی وجہ سے خطے میں کشیدگی میں اضافہ ہوا تھا۔
