حکومت چیف الیکشن کمشنر کو کینیڈا میں سفیر لگا رہی ہے، عمر ایوب
اردو انٹرنیشنل ( مانیٹرنگ ڈیسک) تفصیلات کے مطابق پاکستان تحریک انصاف کے سینئر رہنما عمر ایوب نے دعویٰ کیا ہے کہ حکومت چیف الیکشن کمشنر سکندر سلطان راجا کو کینیڈا میں سفیر لگا رہی ہے۔
قومی اسمبلی اجلاس میں اظہار خیال کرتے ہوئے عمر ایوب نے دعویٰ کیا کہ ہمارے پاس رپورٹس ہیں کہ چیف الیکشن کمشنر کو یہ حکومت کینیڈا بھیج رہی ہے.
عمر ایوب نے چیف الیکشن کمشنر اور دیگر ممبران کے استعفے کا مطالبہ کرتے ہوئے کہا کہ پورے پنجاب سے ہمارے 102 لوگوں کو گرفتارکیاگیا، ہمارے 2 ارکان آج بھی پابند سلاسل ہیں سلمان اکرم راجہ اور سردار لطیف کھوسہ کو گرفتار کیا گیا،ہم سردار لطیف کھوسہ اور دیگر کی گرفتاری کی شدید مذمت کرتے ہیں.
عمر ایوب نے کہا کہ آخر کس قانون کے تحت ہمیں بانی چیئرمین پی ٹی آئی سے ملنے سے روکا جا رہا ہے،منگل کو ہمارے پاس بانی سے ملاقات کے کورٹ آرڈرز تھے، ہمیں کہہ دیا گیا یہاں سکیورٹی خدشات ہیں، ملاقات نہیں ہوگی۔
انہوں نے مزید کہا کہ اڈیالہ جیل سپرنٹنڈنٹ اسد وڑائچ خود کو قانون سے بالاتر سمجھتا ہے، ہم نے اسے عدالت کا حکم دکھایا تو اس نے پھینک دیا۔
