عالمی توانائی بحران: گھر سے کام کریں اور فضائی سفر کم کریں، آیٔ ای اے کی ہنگامی تجاویز

اردو انٹرنیشنل (مانیٹرنگ ڈیسک) رائٹرز کی خبر کے مطابق بین الاقوامی توانائی ایجنسی نے دنیا بھر میں بڑھتی ہوئی توانائی کی قیمتوں کے اثرات کم کرنے کے لیے فوری اور عملی اقدامات کی ہدایت دی ہے۔ ایجنسی نے ورک فرام ہوم اور غیر ضروری فضائی سفر سے اجتناب کو سب سے مؤثر اقدام قرار دیا ہے۔

امریکہ اور اسرائیل کے ساتھ ایران جنگ نے عالمی توانائی مارکیٹ میں غیر یقینی صورتحال پیدا کر دی ہے، جس کے نتیجے میں تیل کی قیمتیں تاریخی سطحوں تک پہنچ گئی ہیں اور صارفین اور کاروبار دونوں پر مہنگائی کا دباؤ بڑھ گیا ہے۔

آیٔ ای اے کے مطابق حکومتیں، کاروباری ادارے اور عام صارف ضروری اقدامات اختیار کر کے بحران کے اثرات کم کر سکتے ہیں جن میں گھر سے کام کو ترجیح دینا، ہائی وے پر رفتار کی حد کم کرنا، اور فضائی سفر سے اجتناب کرنا اگر متبادل ٹرانسپورٹ دستیاب ہو شامل ہیں۔

آیٔ ای اےکے ایگزیکٹو ڈائریکٹر فاتح بیرول نے کہا، ہم نے حال ہی میں آیٔ ای اے کے ایمرجنسی تیل کے ذخائر کا سب سے بڑا ریلیز شروع کیا ہے اور دنیا بھر کی اہم حکومتوں اور توانائی پیدا کرنے والے ممالک کے ساتھ مسلسل رابطے میں ہیں۔ آج کی رپورٹ میں فوری اور قابل عمل اقدامات شامل ہیں جو بحران کے اثرات کم کر سکتے ہیں۔

آیٔ ای اے نے 11 مارچ کو عالمی تیل کی قیمتوں میں اضافے کو کنٹرول کرنے کے لیے ریکارڈ 400 ملین بیرل تیل ریلیز کرنے کا فیصلہ کیا، جس میں امریکہ نے سب سے زیادہ حصہ فراہم کیا۔ یہ اقدام عالمی مارکیٹ میں سپلائی کے خلا کو کم کرنے اور قیمتوں میں استحکام لانے کے لیے کیا گیا ہے۔