فیفا پلیئر آف دی ایئر ایوارڈ، وینسیئس جونیئر اور ایتانا بونماتی کے نام

اردو انٹرنیشنل (اسپورٹس ویب ڈیسک) تفصیلات کے مطابق برازیل اور ریال میڈرڈ کے اسٹار فارورڈ وینیسیئس جونیئرنے فیفا کے سال کے بہترین مرد کھلاڑی کا ایوارڈ جیت لیا، 24 سالہ وینیسیئس نے اسپین کے روڈری اور انگلینڈ کے جوڈ بیلنگھم کو پیچھے چھوڑ کر یہ ایوارڈ جیتا ، جبکہ اسپین اور بارسلونا کی مڈ فیلڈر ایتانا بونماتی نے مسلسل دوسرے سال فیفا ویمنز پلیئر آف دی ایئر کا اعزاز حاصل کیا۔

وینیسیئس نے ریال میڈرڈ کو لا لیگا اور چیمپئنز لیگ کے ٹائٹلز جیتنے میں مدد کی، جہاں انہوں نے 39 میچز میں 24 گول اسکور کیے۔ انہوں نے چیمپئنز لیگ کے فائنل میں بوروسیا ڈورٹمنڈ کے خلاف فیصلہ کن گول کر کے اپنی ٹیم کو فتح دلائی۔
ایوارڈ حاصل کرتے ہوئے وینیسیئس نے کہا:
“یہ سب کچھ ناممکن لگتا تھا جب میں ساؤ گونکالو کی گلیوں میں ننگے پاؤں کھیلتا تھا، اور آج میں یہاں ہوں۔”

دوسری جانب، ایتانا بونماتی نے زیمبیا کی باربرا بندا اور ناروے کی کیرولین گراہم ہینسن کو پیچھے چھوڑ کر فیفا ویمنز پلیئر آف دی ایئر کا ایوارڈ جیتا۔ ایوارڈ وصول کرتے ہوئے انہوں نے کہا:
“یہ ایوارڈ میرے لیے بہت خاص ہے، لیکن میں ہمیشہ کہتی ہوں کہ یہ ٹیم کی محنت کا نتیجہ ہے۔”

بہترین کوچ کا اعزاز
ریال میڈرڈ کے کوچ کارلو اینسیلوٹی کو فیفا کا بہترین مرد کوچ قرار دیا گیا۔ اینسیلوٹی نے اپنے کلب کو گزشتہ سیزن میں لیگ اور چیمپئنز لیگ کے ڈبل ٹائٹلز تک پہنچایا۔
ایوارڈ وصول کرتے ہوئے اینسیلوٹی نے کہا:
“یہ کامیابی میں اپنے کلب، صدر اور دنیا کے بہترین کھلاڑیوں کے ساتھ بانٹنا چاہتا ہوں۔”

فیفا ایوارڈز کی یہ تقریب دوحہ، قطر میں منعقد ہوئی اور یہ عالمی فٹ بال کے ستاروں کے لیے ایک یادگار موقع تھا۔