یونان میں انگلش شائقین کے ساتھ مبینہ بدسلوکی، ایف اے نے تحقیقات کا آغاز کر دیا

اردو انٹرنیشنل (اسپورٹس ویب ڈیسک) تفصیلات کے مطابق انگلش فٹ بال ایسوسی ایشن (ایف اے) نے کہا کہ وہ یونان کے خلاف یوئیفا نیشنز لیگ میں 3-0 کی فتح کے دوران انگلینڈ کے شائقین کے ساتھ ہونے والے سلوک کا جائزہ لے رہی ہے۔

برطانوی میڈیا رپورٹس کے مطابق، یونانی پولیس نے مبینہ طور پر ایتھنز کے اولمپک اسٹیڈیم میں داخل ہونے کی کوشش کرنے والے انگلینڈ کے شائقین کو قابو میں رکھنے کے لیے آنسو گیس اور فسادی شیلڈز کا استعمال کیا۔ ایف اے کے ترجمان نے کہا کہ انہیں معلوم ہوا ہے کہ ہمارے کچھ شائقین کو اسٹیڈیم کے باہر مشکلات کا سامنا کرنا پڑا اور اس معاملے کی مزید تفصیلات جاننے کی کوشش کی جا رہی ہے۔

فٹ بال سپورٹرز ایسوسی ایشن (ایف ایس اے) نے بیان میں کہا کہ “ایک ایسی رات جب پچ پر زبردست کارکردگی سامنے آئی، اس بات کو یقینی بنائے جانے کی ضرورت ہے کہ ہمارے حامیوں کو بلاوجہ خطرے میں نہ ڈالا جائے۔”

تاہم ،یونانی پولیس نے فوری طور پر اس بارے میں کوئی جواب نہیں دیا۔