انگلینڈ کے جیکب بیتھل انجری کے باعث چیمپئنز ٹرافی سے باہر

اردوانٹرنیشنل (اسپورٹس ڈیسک) تفصیلات کے مطابق انگلینڈ کے نوجوان آل راؤنڈر جیکب بیتھل انجری کے باعث آئی سی سی چیمپئنز ٹرافی سے باہر ہو گئے ہیں۔

بھارتی میڈیا کے مطابق انگلینڈ کے کپتان جوس بٹلر نے تصدیق کی ہے کہ بائیں ہاتھ کے بلے باز جیکب بیتھل بھارت کے خلاف جاری ون ڈے سیریز کے دوران ہیمسٹرنگ انجری کا شکار ہونے کے بعد پاکستان میں ہونے والی چیمپئنز ٹرافی میں شرکت نہیں کریں گے۔

ستمبر میں انگلینڈ کے لیے ون ڈے ڈیبیو کرنے والے بیتھل بھارت کے خلاف ناگپور میں سیریز کے پہلے میچ کے دوران زخمی ہو گئے تھے۔

اکیس سالہ کھلاڑی نے میچ میں شاندار کارکردگی کا مظاہرہ کرتے ہوئے 51 رنز بنائے اور شریاس آئر کی وکٹ حاصل کی۔

چوٹ کی وجہ سے بیتھل ہندوستان کے خلاف تین میچوں کی ون ڈے سیریز سے باہر ہو گئے تھے اور انگلینڈ نے اتوار کو دوسرے ون ڈے سے قبل ٹام بینٹن کو ٹیم میں شامل کیا تھا۔

چیمپئنز ٹرافی میں انگلینڈ کا پہلا میچ 22 فروری کو ورلڈ کپ کی فاتح آسٹریلیا سے ہو گا۔