الیکشن کمیشن نے بلے کے نشان سے متعلق پشاور ہائی کورٹ کے فیصلے کو سپریم کورٹ میں چیلنج کردیا
اردو انٹرنیشنل (مانیٹرنگ ڈیسک) الیکشن کمیشن نے پشاور ہائی کورٹ کے فیصلے کے خلاف سپریم کورٹ میں اپیل دائر کر دی، سپریم کورٹ نے الیکشن کمیشن کی اپیل کو ڈائری نمبر بھی الاٹ کر دیا۔اپیل میں مؤقف اپنایا گیا کہ پشاور ہائی کورٹ کا فیصلہ آئین اور قانون کے خلاف ہے۔
واضح رہے کہ گزشتہ روز پشاور ہائی کورٹ نے انتخابی نشان کیس میں الیکشن کمیشن کا فیصلہ معطل کرتے ہوئے پاکستان تحریک انصاف (پی ٹی آئی) کو ’بلے‘ کے نشان پر الیکشن لڑنے کی اجازت دے دی تھی۔
آج الیکشن کمیشن حکام نے اجلاس میں فیصلہ کیا تھا کہ پشاور ہائیکورٹ کے فیصلے کے خلاف سپریم کورٹ سے رجوع کیا جائے گا.اجلاس میں کمیشن کے چاروں ممبران اورسپیشل سیکرٹر نے شرکت کی۔
اجلاس میں کمیشن کے چاروں ممبران اورسپیشل سیکرٹریز کو طلب کیا گیا تھا۔الیکشن کمیشن کے لاء ونگ نے کمیشن کو پشاور ہائی کورٹ فیصلے سے متعلق قانونی نکات پر بریفنگ دی گئی۔ آج ہی الیکشن کمیشن کو پی ٹی آئی پارٹی انتخابات اور بلے کا نشان واپس دینے سے متعلق پشاور ہائیکورٹ کا فیصلہ موصول ہو ا جس میں کہا گیا ہے کہ الیکشن کمیشن کا فیصلہ غیرقانونی ہے۔
پشاور ہائی کورٹ فیصلے کے مطابق الیکشن کمیشن کے پاس فیصلے کا اختیار نہیں تھا۔ الیکشن کمیشن پی ٹی آئی کو انتخابی نشان سے متعلق سرٹیفیکٹ ویب سائٹ پر جاری کرے۔ پی ٹی آئی بلے انتخابی نشان کی حقدار ہے۔خیال رہے کہ پشاور ہائی کورٹ نے انتخابی نشان کیس میں الیکشن کمیشن کا فیصلہ معطل کرتے ہوئے پی ٹی آئی کو بلے کے نشان پر الیکشن لڑنے کی اجازت دے دی۔
