جے سوریا کو سری لنکا ٹیم کا فل ٹائم ہیڈ کوچ تعینات کرنے کا فیصلہ
اردوانٹرنیشنل(اسپورٹس ڈیسک) تفصیلات کے مطابق سری لنکا کرکٹ نے باضابطہ طور پر اعلان کیا ہے کہ سابق کرکٹ اسٹار اور سری لنکا مینز ٹیم کے عبوری ہیڈ کوچ سنتھ جے سوریا مزید ایک سال کے لیے ہیڈ کوچ کے طور پر برقرار رہیں گے۔
یہ فیصلہ جے سوریا کی قیادت میں متاثر کن پرفارمنس کے ایک عرصے کے بعد آیا ہے، جس سے قومی ٹیم میں انتہائی ضروری استحکام آیا.
سری لنکن میڈیا کے مطابق سنتھ جے سوریا سری لنکا کرکٹ ٹیم کے عبوری ہیڈ کوچ کی ذمے داریاں نبھا رہے تھے۔
میڈیا رپورٹس کے مطابق سنتھ جے سوریا کی نئی مدت نیوزی لینڈ کے خلاف ٹیسٹ سیریز کے بعد شروع ہو گی۔
سنتھ جے سوریا کی کوچنگ میں سری لنکن ٹیم بھارت کو ون ڈے سیریز میں شکست دے چکی ہے اور انگلینڈ کو ان کے ہوم گراؤنڈ پر ٹیسٹ میچ میں شکست سے دوچار کر چکی ہے۔
