چنیوٹ:50 افراد کا قاتل سی ٹی ڈی کی کارروائی میں ساتھی سمیت ہلاک
محکمہ انسداد دہشت گردی (سی ٹی ڈی) نے چنیوٹ میں کارروائی کرتے ہوئے 50 افراد کے قاتل کو مقابلے میں ساتھی سمیت ہلاک کر دیا۔
ذرائع کے مطابق سی ٹی ڈی نے بتایا کہ انٹیلی جنس آپریشن چنیوٹ کے علاقے میں کیا گیا، آپریشن کے دوران دہشت گرد وں کے ساتھ فائرنگ کا تبادلہ ہوا، جس کے نتیجے میں 50 افراد کا قاتل ساتھی سمیت مارا گیا۔ہلاک دہشت گرد کے سر کی قیمت 25 لاکھ روپے مقرر کی گئی تھی۔
سی ٹی ڈی نے بتایا کہ مذہبی منافرت پر مبنی دہشت گردی میں غضنفر ندیم ماسٹر مائنڈ تھا، غضنفرندیم 2011 سے مفرور تھا، مختلف ادارے تلاش جاری رکھے ہوئے تھے.
حکام کے مطابق کارروائی کے دوران دہشت گردوں کے ٹھکانے سے گولہ بارود، جدید اسلحہ قبضہ میں لیا گیا، غضنفر ندیم عرف خالد حبیب مختلف القابات سے جانا جاتا تھا۔
سی ٹی ڈی حکام نے بتایا کہ ہلاک دہشت گرد فیصل آباد میں آئی ایس آئی سمیت 11 بڑی کارروائیوں میں ملوث تھا۔
