چینی سفیر جیانگ زی ڈونگ کی وفاقی وزیر داخلہ محسن نقوی سے ملاقات،چینی شہریوں کی سکیورٹی پر تبادلہ خیال
اردو انٹرنیشنل (مانیٹرنگ ڈیسک) چین کے سفیر جیانگ زی ڈونگ نے وزارت داخلہ میں وفاقی وزیر محسن نقوی سے ملاقات کی ہے جس میں وزیر اعظم پاکستان کے دورہ چین کی تیاریوں اورپاکستان میں چینی شہریوں کی سکیورٹی پر تبادلہ خیال کیا گیا،ملاقات میں بشام واقعہ پر ہونے والی پیش رفت کا جائزہ لیا گیا.
وزیرداخلہ نے چینی سفیر کو بتایا کہ بشام میں دہشتگردی پاک چین دوستی پر حملہ تھا۔ملوث عناصر کو ہر صورت عبرتناک انجام تک پہنچائیں گے۔
محسن نقوی نے کہا کہ لاہور اور کراچی میں چینی قونصلیٹ کے دوروں کے بعدملک بھر میں چینی شہریوں کی سکیورٹی کے لئے نئے ایس او پیز تیار کئے ہیں جن پر سختی سے عملدرآمد یقینی بنایا جا رہا ہے۔
وزیرداخلہ نے چینی سفیر کو یقین دلایا کہ پاک چین دوستی کو سبوتاژ کرنے کوئی سازش کامیاب نہیں ہونے دیں گے،یہ تعلقات دہائیوں پر محیط ہیں اور دشمن ان مضبوط تعلقات میں دراڑ نہیں ڈال سکتا ۔
