اردو انٹرنیشنل (اسپورٹس ڈیسک) تفصیلات کے مطابق بورڈ آف کنٹرول فار کرکٹ ان انڈیا (بی سی سی آئی) کے نائب صدر راجیو شکلا نے اگلے سال چیمپئنز ٹرافی کے لیے بھارتی ٹیم کے دورہ پاکستان کے بارے میں کھل کر بات کی۔
پیر کو اے این آئی سے بات کرتے ہوئے شکلا نے کہا کہ بی سی سی آئی ہندوستانی ٹیم کو پاکستان بھیجنے سے متعلق وفاقی حکومت کی ہدایات پر عمل کرے گا۔
شکلا نے کہا کہ چیمپئن ٹرافی کے معاملے میں ہم وہ کریں گے جو حکومت ہند ہمیں کرنے کو کہے گی ہم اپنی ٹیم تبھی بھیجتے ہیں جب حکومت ہند ہمیں اجازت دیتی ہے لہذا، ہم ہندوستانی حکومت کے فیصلے کے مطابق جائیں گے۔
دریں اثنا، پاکستان کرکٹ بورڈ (پی سی بی) اگلے سال فروری میں ملک میں کھیلی جانے والی چیمپئنز ٹرافی سے قبل ہندوستانی کرکٹ ٹیم کے لیے سیکیورٹی پلان تشکیل دے رہا ہے۔
پی سی بی نے ابتدائی ڈرافٹ شیڈول میں پہلے ہی تین وینیوز، کراچی، لاہور اور راولپنڈی انٹرنیشنل کرکٹ کونسل (آئی سی سی) کو پیش کر دیے ہیں اور گورننگ باڈی اس پر شریک ممالک سے رائے لے گی۔
آٹھ ٹیموں کا ٹورنامنٹ دو ہفتوں تک جاری رہنے کی توقع ہے حالانکہ ابھی تک درست تاریخوں کی تصدیق نہیں ہوئی ہے۔
2008 کے ایشیا کپ کے بعد سے کوئی ہندوستانی ٹیم پاکستان میں نہیں کھیلی۔
2025 کی آئی سی سی چیمپئنز ٹرافی کے لیے جن ٹیموں کی تصدیق کی گئی ہے ان میں پاکستان (میزبان)، بھارت، جنوبی افریقہ، آسٹریلیا، نیوزی لینڈ، افغانستان، انگلینڈ اور بنگلہ دیش شامل ہیں۔
