اردو انٹرنیشنل (مانیٹرنگ ڈیسک) پاکستان اسٹاک ایکسچینج میں کاروباری ہفتے کے آغاز پر مسلسل 9 ویں روز بھی تیزی کا رجحان برقرار ہے، ایک ہزار سے زائد پوائنٹس کے اضافے سے 100 انڈیکس ایک لاکھ 10 ہزار پوائنٹس کی نفسیاتی حد بھی عبور کرگیا۔
پیر کو نئے کاروباری ہفتے کے آغاز پر صبح 11 بجے پاکستان اسٹاک ایکسچینج میں بینچ مارک 100 انڈیکس ایک ہزار 44 پوائنٹس یا 0.96 فیصد کے اضافے سے ایک لاکھ 10 ہزار 98 پوائنٹس پر پہنچ گیا۔
واضح رہے کہ جمعے کو کاروباری ہفتے کے اختتام پر 100 انڈیکس ایک لاکھ 9 ہزار 53 پوائنٹس کی سطح پر بند ہوا تھا۔
پچھلے 2 ہفتے کے دوران پاکستان اسٹاک ایکسچینج نے ایک دن میں سب سے زیادہ اضافے کے کئی ریکارڈ بنائے ہیں، میوچوئل فنڈز میں وسیع پیمانے پر خریداری کے باعث گزشتہ ہفتے انڈیکس میں ہفتہ وار 7 ہزار 697 پوائنٹس کا اضافہ ہوا۔
چیس سیکیورٹیز کے ریسرچ ڈائریکٹر یوسف ایم فاروق نے کہا کہ ’شرح سود بلندترین سطح سے اب زیادہ معمول کی سطح پر واپس آ گئی ہے، اس تبدیلی نے اسٹاک ویلیو ایشن کو تیزی سے زیادہ معقول سطح پر لا کھڑا کیا ہے۔
انہوں نے مزید کہاکہ مارکیٹ کی شرح سود جو جون 2024 میں 20.5 فیصد پر موجود تھی، اب 12 فیصد کے قریب پہنچ گئی ہے، امید ہے کہ 16 دسمبر کو آنے والی نئی مانیٹری پالیسی میں شرح سود مزید کمی آجائے گی۔
یوسف ایم فاروق نے مزید کہا کہ ’ شرح سود میں آنے والی اس بڑی کمی نے فکسڈ انکم سے ایکویٹیز کی طرف نمایاں منتقلی کو جنم دیا ہے، میوچل فنڈز سے ایکویٹی مارکیٹ میں غیر معمولی رفتار سے ریکارڈ رقم داخل ہوئی ہے’۔
تجزیہ کار کے مطابق موجودہ مارکیٹ کی حرکیات کو معمول کی طرف واپسی کے طور پر بیان کیا جا سکتا ہے۔
