operation
بلوچستان: مختلف علاقوں میں سیکیورٹی فورسز کی جوابی کارروائیوں میں 12 دہشتگرد ہلاک
اردو انٹرنیشنل (مانیٹرنگ ڈیسک) بلوچستان میں کئی مقامات پر رات گئے حملوں پر سیکیورٹی فورسز کی جوابی کارروائی میں 12 دہشت گرد ہلاک اور متعدد زخمی ہو گئے۔
ریڈیو پاکستان کی رپورٹ کے مطابق دہشت گردوں کے خاتمے تک آپریشن جاری رہے گا، مزید کہا کہ بلوچستان میں دہشت گردوں نے کئی مقامات پر بزدلانہ حملے کیے، تاہم رپورٹ میں حملوں کے مقامات کی وضاحت نہیں کی گئی۔
رپورٹ کے مطابق سیکیورٹی فورسز اور قانون نافذ کرنے والے اداروں نے ان حملوں کا موثر جواب دیا۔
واضح رہے کہ اس سے قبل آج مسلح افراد نے موسیٰ خیل کے ضلع راشام میں بین الصوبائی شاہراہ کو بلاک کر دیا اور 23 مسافروں کو بسوں سے اتار دیا اور ان کی شناخت چیک کرنے کے بعد ان کو گولیاں ماردیں۔
علاقے کے ڈپٹی کمشنر حمید ظاہر نے خبر رساں ادارے روئٹرز کو بتایا کہ مسلح افراد نے نہ صرف مسافروں کو قتل کیا بلکہ کوئلہ لے جانے والے ٹرکوں کے ڈرائیوروں کو بھی قتل کیا۔
انہوں نے مزید کہا کہ کم از کم 10 ٹرکوں کو ان کے ڈرائیوروں کی ہلاکت کے بعد آگ لگا دی گئی۔
