اردو انٹرنیشنل (اسپورٹس ویب ڈیسک) تفصیلات کے مطابق یوئیفا چیمپیئنز لیگ کے میچ میں ریال میڈرڈ کو اے سی میلان کے ہاتھوں شکست کا سامنا کرنا پڑا اور یہ ریال میڈرڈ کی اپنے ہوم گراؤنڈ، سینٹیاگو برنابیو، میں مسلسل دوسری شکست ہے کیونکہ اس سے قبل انہیں بارسلونا کے ہاتھوں ایل کلاسیکو میچ میں 4-0 سے شکست ہوئی اور اس طرح انہوں نے چیمپئنز لیگ کے پہلے چار میچز میں سے دو ہارے ہیں۔

اے سی میلان کے خلاف میچ میں میلک تھیاؤ کے پہلے گول کے بعد ونیسیئس جونیئر نے میڈرڈ کے لیے پنالٹی پر گول کرکے اسکور برابر کیا، لیکن الوارو موراتا اور تیجانی ریجنڈرز کے گولز نے میلان کو جیت دلائی۔

اس شکست کے بعد ریال میڈرڈ کے کوچ کارلو اینسیلوٹی کا کہنا ہے کہ ان کی ٹیم کو اپنی کارکردگی کی فکر کرنی چاہیے کیونکہ وہ چیمپئنز لیگ کے میچ میں اے سی میلان سے ہار گئی۔

اس سے قبل بھی میڈرڈ کی کارکردگی اچھی نہیں رہی۔ وہ اکتوبر میں للی سے ہار چکے ہیں، اور ابھی تک چار میچز میں صرف چھ پوائنٹس حاصل کیے ہیں۔

میڈرڈ کے کوچ اینسیلوٹی نے کہا، “ہمیں اپنی کارکردگی پر غور کرنی چاہیے، ہماری ٹیم اپنا بہترین کھیل پیش نہیں کر رہی۔ ہمیں زیادہ منظم اور مضبوط ہونا پڑے گا۔ ہم نے بہت سے گول دے دیے ہیں اور ہماری دفاعی حکمت عملی ٹھیک نہیں ہے، ہمیں اس پر کام کرنا ہوگا۔”

دوسری طرف، اے سی میلان نے بھی سیزن کا آغاز بہت زیادہ اچھا نہیں کیا ہے۔ انہوں نے اپنے پہلے تین چیمپئنز لیگ میچز میں سے صرف ایک جیتا ہے، اور سیری اے لیگ میں لیڈر نپولی سے آٹھ پوائنٹس پیچھے ساتویں نمبر پر ہیں۔

میلان کے مینیجر پاؤلو فونسیکا نے اپنی ٹیم کی کارکردگی کو سراہا۔ پرتگالی کوچ کا کہنا تھا کہ “کھلاڑی یہاں بہادری کے ساتھ آئے، انہیں کوئی خوف نہیں تھا۔ پہلے ہاف میں ہم نے کافی مواقع بنائے، اور دوسرے ہاف میں بھی متحد ہو کر مقابلہ کیا۔ ہم یقیناً اس جیت کے حق دار تھے۔”