اردو انٹرنیشنل اسپورٹس ویب ڈیسک تفصیلات کے مطابق رواں سال کے تیسرے بڑے گرینڈ سلام ومبلڈن اوپن ٹینس ٹورنامنٹ کا 137 واں ایڈیشن یکم جولائی سے انگلینڈ میں شروع ہوگا ، ومبلڈن اوپن ٹینس ٹورنامنٹ آل انگلینڈ لان ٹینس اور کروکٹ کلب ومبلڈن میں کھیلا جائے گا، میگا ایونٹ میں اے ٹی پی کا 137جبکہ ڈبلیو ٹی اے کا 130 واں ایڈیشن ہو گا،اس کے کامیاب انعقاد کے لئے تیاریاں عروج پر ہیں۔
میگا ایونٹ گراس کورٹ پر کھیلا جائے گا جس میں دنیائے ٹینس کے نامور کھلاڑی ٹائٹل کے حصول کے لئے ایکشن میں نظر آئیں گے۔ میگا ایونٹ میں مینز سنگلز، ویمنز سنگلز، مینز ڈبلز ویمنز ڈبلز اور مکسڈ ڈبلز سمیت دیگر مقابلے ہوں گے۔ ہسپانوی نامور ٹینس سٹار کارلوس الکاراز میگا ایونٹ کے مینز سنگلز مقابلوں میں اپنے اعزاز کا دفاع کریں گے۔
خواتین کے سنگلز مقابلوں میں جمہوریہ چیک کی مارکٹا ونڈروسووا نے 2023 کا ویمنز سنگلز ٹائٹل اپنے نام کیا تھا۔
اسی طرح مینز ڈبلز مقابلوں میں نیدرلینڈز کے ویزلی کولہوف اور ان کے برطانوی نیل سکوپسکی اپنے اعزاز کی بقا کے لئے کوشاں ہوں گے ۔ ویمنز ڈبلز مقابلوں میں چائینز تاپئے کی ہیش سو وائی اور ان کی جمہوریہ چیک کی جوڑی دار باربورا سٹریکووا اپنے ٹائٹل کے دفاع کے لئے پنجہ آزمائی کریں گی۔رواں سال کا تیسرا میگا ایونٹ یکم جولائی سے شروع ہوکر (14دن جاری رہنے کے بعد )14جولائی کو اختتام پذیر ہوگا۔
اٹلی کے نامور ٹینس سٹار اور عالمی نمبر ون جینک سنر کو مینز سنگلز مقابلوں میں ٹاپ سیڈ جبکہ سربیا کے شہرہ آفاق ٹینس سٹار اور ومبلڈن اوپن کے دفاعی چیمپئن نوویک جوکووچ کو سیکنڈ سیڈقرار دیا گیا ہے۔اسی طرح خواتین کے سنگلز مقابلوں میں عالمی نمبر ایک پائولش ٹینس سٹار آئیگا سویٹیک میگا ایونٹ کے لیے ٹاپ سیڈڈ قرار پائی ہیں ،امریکی ٹینس سٹار کوکو گف سیکنڈ سیڈ قرار پائی ہیں۔
میگا ایونٹ کی انتظامیہ کے مطابق ومبلڈن اوپن ٹینس کے لئے 50 کروڑ پائونڈ کی انعامی رقم مختص ہے۔جس میں 2023 کے مقابلے میں 11.9 فیصد اضافہ ہوا ہے۔
مردوں اور خواتین کے سنگلز کھلاڑی کتنا کمائیں گے؟
* پہلا راؤنڈ: 60,000 پاؤنڈ
* دوسرا راؤنڈ : 93,000 پاؤنڈ
* تیسرا راؤنڈ : 143,000 پاؤنڈ
* راؤنڈ آف 16: 22,6000 پاؤنڈ
* کوارٹر فائنل: 375,000 پاؤنڈز
* سیمی فائنلز: 715,000 پاؤنڈز
* رنر اپ: 1.4 ملین پاؤنڈ
* چیمپئن: 2.7 ملین پاؤنڈ