Pakistan, Saudi Arabia concerned over ceasefire violations in Lebanon
پاکستان اور سعودی عرب کا لبنان میں جنگ بندی کی خلاف ورزیوں پر شدید تشویش کا اظہار
اسلام آباد (مانیٹرنگ ڈیسک) پاکستان اور سعودی عرب نے لبنان میں جاری جنگ بندی کی خلاف ورزیوں پر شدید تشویش کا اظہار کیا ہے اور دیرپا امن و استحکام کے لیے جنگ بندی کے مکمل احترام اور نفاذ کی ضرورت پر زور دیا ہے۔
نائب وزیراعظم و وزیر خارجہ اسحاق ڈار نے سعودی وزیر خارجہ شہزادہ فیصل بن فرحان سے ٹیلی فون پر رابطہ کیا۔ دونوں رہنماؤں نے لبنان میں جنگ بندی کی خلاف ورزیوں کی مذمت کرتے ہوئے کہا کہ دیرپا امن کے قیام کے لیے فوری اقدامات ضروری ہیں۔ اسحاق ڈار نے پائیدار امن کے لیے پاکستان کی کوششوں میں سعودی عرب کی مسلسل حمایت کو سراہا۔
دوسری جانب، ترجمان دفتر خارجہ طاہر حسین اندرابی نے جاری بیان میں کہا کہ پاکستان لبنان میں اسرائیلی حملوں سے بھاری جانی نقصان اور انفراسٹرکچر کی تباہی کی سخت مذمت کرتا ہے۔ بیان میں کہا گیا کہ پاکستان لبنانی حکومت اور عوام کے ساتھ مکمل یکجہتی کا اظہار کرتا ہے اور مشکل وقت میں ان کے ساتھ کھڑا ہے۔
ترجمان نے مزید کہا کہ اسرائیلی اقدامات نہ صرف بین الاقوامی قوانین کی خلاف ورزی ہیں بلکہ خطے میں امن کی کوششوں کو بھی نقصان پہنچا رہے ہیں۔ پاکستان نے لبنانی آزادی، علاقائی خودمختاری اور امن و استحکام کی مکمل حمایت کا اعادہ کیا۔
