واشنگٹن ڈی سی: مسافر طیارہ فوجی ہیلی کاپٹر سے ٹکرا کر تباہ

واشنگٹن ڈی سی میں ایک مسافر طیارہ امریکی فوجی ہیلی کاپٹر سے ٹکرا کر تباہ ہوگیا۔ مسافر طیارے میں عملے سمیت 64 افراد موجود تھے جب یہ فوجی ہیلی کاپٹر سے ٹکرایا اور دریائے پوٹومیک میں گر کر تباہ ہو گیا۔

بدھ کے روز مقامی وقت کے مطابق رات 9 بجے پی ایس اے ایئرلائنز کا ایک مسافر طیارہ بمبارڈیئر سی آر جے 700، لینڈنگ کے دوران ایک امریکی فوجی ہیلی کاپٹر سکورسکی ایچ-60 سے ٹکرا گیا، جو ورجینیا کے فورٹ بیلوائر سے اڑا تھا اور اس میں 3 فوجی اہلکار سوار تھے۔ حادثہ رونالڈ ریگن واشنگٹن نیشنل ایئرپورٹ کے قریب پیش آیا۔

امریکی فضائیہ (ایف اے اے) اور نیشنل ٹرانسپورٹیشن سیفٹی بورڈ نے حادثے کی تحقیقات شروع کر دی ہیں۔ جبکہ حکام نے ابھی تک ہلاکتوں کی تصدیق نہیں کی۔ تاہم سی بی ایس نیوز کے مطابق دریائے پوٹومیک سے 18 لاشیں نکالی جا چکی ہیں۔

امریکی میڈیا کی رپورٹس کے مطابق، مسافر طیارہ دو حصوں میں تقسیم ہو چکا ہے،جبکہ ہیلی کاپٹر الٹا پانی میں ڈوبا ہوا ہے۔ تقریباً 300 ریسکیو اہلکار کشتیوں کے ذریعے لاشوں کو نکالنے کی کوشش کررہے ہیں‌سخت سردی کے باوجود امدادی کارروائیاں جاری ہیں، اور مزید مسافروں کی تلاش بھی جاری ہے۔

امریکی حکومت نے فوری طور پر رونالڈ ریگن ایئرپورٹ پر تمام پروازیں معطل کر دی ہیں۔ حادثے کی مکمل وجوہات جاننے کے لیے امریکی فضایئہ اور نیشنل ٹرانسپورٹیشن سیفٹی بورڈ نے مشترکہ تحقیقاتی ٹیم تشکیل دے دی ہے۔ جبکہ واشنگٹن ڈی سی کی میئر میوریل باؤزر کا کہنا ہے کہ وہ حادثے کی مکمل تحقیقات کرائیں گی۔