ناران میں گلیشیئر گرنے کی وجہ سے متعدد ہوٹل تباہ
تفصیلات کے مطابق خیبرپختونخوا کے مشہور سیاحتی مقام ناران میں جمعرات کے روز برفانی گلیشیئر نے تباہی مچا دی، ناران جھیل روڈ پر موجود متعدد ہوٹل گلیشیئر کے نیچے دب گئے، جب کہ برف باری کے باعث شاہراہ کاغان بھی تاحال بند ہے جس کی وجہ امدادی ٹیمیں موسم بہتر ہونے پر ہی ناران پہنچ سکیں گی۔
بتایا گیا ہے کہ ناران کے مشہور سیاحتی مقام جھیل سیف الملوک جانے والی روڈ پر برفانی گلیشیئر گرنے سے متعدد ہوٹل منہدم ہو گئے ہیں، تاہم آخری اطلاعات تک برفانی گلیشئر کی وجہ سے تباہ ہونے والے ہوٹلوں میں کوئی شخص موجود نہیں تھا، اس لیے تاحال کوئی جانی نقصان کی اطلاع نہیں ملی۔
بتایا گیا ہے کہ برفباری موسم کی وجہ سے اس علاقے کے راستے اور ہوٹل نومبر سے بند ہیں۔
کاغان ڈیولپمینٹ اتھارٹی کے ذرائع کے مطابق گلیشیئر گرنے کے باعث ہونے والی تباہی سے ہونے والے نقصان کے متعلق کچھ کہنا قبل ازوقت ہوگا۔
