سرگودھا میں باپ نے گھریلو ناچاقی پر تین بیٹیوں کو گولی مارکر خودکشی کرلی
اردو انٹرنیشنل (مانیٹرنگ ڈیسک) سرگودھا کی تحصیل بھیرہ میں باپ نے 3 بیٹیوں پر فائرنگ کرنے کے بعد خود کو گولی مار کر خودکشی کرلی، واقعے میں دو بچیاں جاں بحق جبکہ ایک شدید زخمی ہوگئی۔
پولیس کے مطابق ملزم نے بیوی کو طلاق دی ہوئی تھی اور بچیاں اپنی ماں کے ساتھ رہتی تھیں، باپ ملاقات کے بہانے اپنی بچیوں کو ساتھ لے گیا تھا جہاں یہ افسوسناک واقعہ پیش آگیا۔
پولیس کا کہنا تھا کہ فائرنگ کے نتیجے میں تینوں بچیاں شدید زخمی ہو گئی تھیں، جنہیں طبی امداد کیلئے تعلقہ ہیڈ کوارٹر اسپتال بھیرہ منتقل کیا گیا۔
پولیس کے مطابق زخمی بچیوں کی اسپتال منتقلی کے دوران 10 سالہ بچی اسپتال پہنچنے سے پہلے ہی دم توڑ گئی جبکہ دوسری بچی اسپتال پہنچ کر جاں بحق ہوئی، بچیوں پر فائرنگ کے بعد باپ نے خود کو گولی مار کر خودکشی کر لی تھی۔
پولیس ذرائع کے مطابق قتل اور خودکشی کی واردات گھریلو ناچاقی کا شاخسانہ ہے۔
