پی آئی اے کی ایئر ہوسٹس کینیڈا میں متعدد پاسپورٹ رکھنے کے الزام میں گرفتار
اردو انٹرنیشنل ( مانیٹرنگ ڈیسک) کینیڈا کے ٹورنٹو ایئرپورٹ پر پاکستان انٹرنیشنل ایئر لائن (پی آئی اے) کی فضائی میزبان کو حراست میں لے لیا گیا۔
تفصیلات کے مطابق پی آئی اے کی لاہور سے کینیڈا جانے والی پرواز پی کے 789 پر تعینات حنا ثانی نامی ایک فضائی میزبان کو ٹورنٹو ایئرپورٹ پر اس وقت حراست میں لے لیا گیا جب اس کے پاس سے متعدد پاسپورٹ برآمد ہوئے۔
ذرائع کے مطابق ثانی کو اس سے قبل کینیڈا میں ممنوعہ اشیا لانے پر تنبیہ کی گئی تھی۔
ایئر ہوسٹس ہونے کے علاوہ ثانی کو سوشل میڈیا پر فیشن ماڈل کے طور پر بھی جانا جاتا ہے۔
پرواز میں حنا ثانی کے علاوہ 7 دیگر فضائی میزبانوں کو بھی بھیجا گیا جن کو پی آئی اے نے ٹورنٹو کے لیے نو فلائی ڈکلیئر کیا ہوا تھا۔
ترجمان پی آئی اے کے مطابق پی آئی اے کو اس واقعے کا علم ہے اور وہ کینیڈین حکام سے رابطے میں ہے۔
ترجمان پی آئی اے نے مزید کہا کہ پی آئی اے کینیڈین حکام کے ساتھ مکمل تعاون کرے گی اور ضرورت پڑنے پر کوئی بھی قانونی کارروائی کرے گی۔
خیال رہے کہ اپنے پاسپورٹ کے علاوہ دیگر افراد کے پاسپورٹس کے ساتھ سفر کرنا بین الاقوامی جرم ہے۔
