اردو انٹرنیشنل(اسپورٹس ڈیسک) تفصیلات کے مطابق پاکستان کرکٹ بورڈ (پی سی بی) کے چیئرمین محسن نقوی نے تصدیق کی کہ وہ اس بات کی تحقیقات کریں گے کہ احسان اللہ کی انجری کو سابقہ بورڈ نے غلط استعمال کیا یا نہیں۔
احسان، رواں ماہ کے شروع میں معروف آرتھوپیڈک سرجن پروفیسر ایڈم واٹس سے اپنی کہنی کی چوٹ کا علاج کرانے کے لیے انگلینڈ گئے تھے جس کے بعد فیصلہ کیا جائے گا کہ سرجری کی ضرورت ہے یا نہیں۔
نقوی نے اپنے آفیشل ایکس پر جاری کردہ ایک بیان میں کہا کہ پی سی بی نے یہ تجزیہ کرنے کے لیے ایک آزاد میڈیکل بورڈ تشکیل دینے کا فیصلہ کیا ہے کہ آیا احسان اللہ کے میڈیکل کیس کو بورڈ کی میڈیکل سپورٹ ٹیم نے ٹھیک طریقے سے ہینڈل کیا تھا۔
بیان میں مزید کہا گیا کہ ڈاکٹر جاوید اکرم، ڈاکٹر رانا دلاوائز، اور ڈاکٹر ممریز نقشبند، پر مشتمل میڈیکل بورڈ پیسر کے مناسب علاج کے لیے مستقبل کے لائحہ عمل کی بھی سفارش کرے گا۔
پی سی بی کے میڈیکل ڈپارٹمنٹ کے سربراہ ڈاکٹر سہیل سلیم نے تصدیق کی کہ احسان اللہ کے کیس میں کوئی غلط فہمی نہیں ہوئی۔
