پاکستان اسپورٹس بورڈ  نے ارشد ندیم کے کوچ سلمان اقبال بٹ پر عائد تاحیات پابندی ختم کر دی

اسلام آباد: پاکستان اسپورٹس بورڈ  نے اولمپک گولڈ میڈلسٹ ارشد ندیم کے کوچ اور معروف ایتھلیٹکس ٹرینر سلمان اقبال بٹ پر عائد تاحیات پابندی ختم کرتے ہوئے ان کی پیشہ ورانہ حیثیت بحال کر دی ہے۔

فیصلہ پی ایس بی کے جج سینیٹر پرویز رشید نے جاری کیا، جس میں ایتھلیٹکس فیڈریشن آف پاکستان (اے ایف پی) کی جانب سے 12 اکتوبر 2025 کو عائد کی گئی پابندی کو غیر قانونی، غیر آئینی اور دائرہ اختیار سے باہر قرار دیتے ہوئے کالعدم قرار دیا گیا۔

فیصلے کے مطابق بٹ کے خلاف کارروائی بغیر چارج شیٹ، انکوائری اور مؤثر حقِ دفاع کے کی گئی، جو آئین پاکستان کے آرٹیکل 4، 10-A اور 25 کی صریح خلاف ورزی ہے۔ حکم نامے میں نہ صرف پابندی ختم کی گئی بلکہ اے ایف پی کو ہدایت کی گئی کہ عالمی اداروں کو بھیجے گئے تمام منفی خطوط فوری واپس لیے جائیں اور آئندہ کسی بھی ہتک آمیز یا متعصبانہ مواصلات سے گریز کیا جائے۔

کیس میں پنجاب ایتھلیٹکس ایسوسی ایشن کے انتخابات کا تنازع بھی زیرِ غور آیا، جس میں فیصلہ ہوا کہ یہ معاملہ اے ایف پی کے دائرہ اختیار میں نہیں آتا جج نے قرار دیا کہ پابندی نے ارشد ندیم سمیت پاکستان کے ایلیٹ ایتھلیٹس کی تیاریوں اور بین الاقوامی ساکھ کو نقصان پہنچایا۔

سلمان بٹ کی بحالی کے بعد ارشد ندیم کی جانب سے جمع کرائی گئی ان کی حمایت بھی ریکارڈ کا حصہ رہی کارروائی میں پی ایس بی  کے قانونی مشیر سیف الرحمان راؤ اور اے ایف پی کے نمائندگان بریگیڈیئر (ر) وجاہت حسین و ایڈووکیٹ عثمان اکرم پیش ہوئے۔