پاکستان فٹبال فیڈریشن نے مالیاتی مشیر کے لیے تجاویز طلب کر لیں

اردو انٹرنیشنل اسپورٹس ویب ڈیسک تفصیلات کے مطابق پاکستان فٹبال فیڈریشن نے مالیاتی مشیر کے لیے تجاویز (آر ایف پی) موصول کرنے کااعلان کیا ہے جو پی ایف ایف کو فٹبال (مینز اور ویمنز سینئر) اور فٹسال لیگ چلانے میں مدد گار ثابت ہوگا۔ پی ایف ایف کو معروف ایڈوائزری فرمز اور کنسلٹنٹس سے اظہار دلچسپی پہلے ہی موصول ہو رہے ہیں۔ دلچسپی رکھنے والی فرمز پی ایف ایف کی ویب سائٹ
www.pff.com.pk
پر بڈ کی مکمل دستاویزات حاصل کر سکتی ہیں اور بڈ کے دستاویزات کے حوالے سے سوالات کےلئے 15 جولائی 2024 کو فٹبال ہاؤس، لاہور میں ہونے والی میٹنگ میں بھی شرکت کر سکتی ہیں۔ ٹیکنکل بڈ جمع کرانے کی آخری تاریخ 21 جولائی 2024 ہے جوکہ
mail@pff.com.pk
پر موصول کی جائے گی جبکہ فنانشل بڈ 24 جولائی تک جمع کروائی جاسکتی ہے۔

پی ایف ایف نے آئندہ بڈ کے عمل اور لیگ پروجیکٹ کے لیے شاہ رخ سہیل کو بطور کنسلٹنٹ شامل کیا ہے ۔چیئرمین پی ایف ایف نارملائزیشن کمیٹی ہارون ملک کا کہنا ہے کہ فٹبال شائقین اور اسٹیک ہولڈرز نے پروفیشنل لیگ پر بہت زور دیا ہے۔ لیگ کا ایک ایسا ڈھانچہ بنانے کی ضرورت ہے جو پاکستان میں تمام اسٹیک ہولڈرز کو اہمیت دے گا۔