او آئی سی وزرائے خارجہ کونسل کا اجلاس، وزیر خارجہ اسحٰق ڈار کی شرکت
اردو انٹرنیشنل (مانیٹرنگ ڈیسک) ترجمان دفتر خارجہ کے مطابق او آئی سی وزرائے خارجہ کونسل اجلاس میں نائب وزیر اعظم و وزیر خارجہ اسحٰق ڈار نے شرکت کی، اجلاس اس وقت گیمبیا کے شہر بنجول میں جاری ہے۔ وزیر خارجہ اسحٰق ڈار اجلاس میں پاکستانی وفد کی قیادت کر رہے ہیں۔
ترجمان دفتر خارجہ کے مطابق گیمبیا کے شہر بنجول میں جاری او آئی سی وزرائے خارجہ کونسل اجلاس میں وزیر خارجہ اسحٰق ڈار نے پاکستانی وفد کی قیادت کرتے ہوئے شرکت کی۔ وزیر خارجہ دوران اجلاس شریک رہنماؤں سے ملاقاتیں بھی کریں گے۔
ترجمان کے مطابق سربراہی اجلاس میں پاکستان کی ترجیحات میں اسلامو فوبیا کا خاتمہ، اقوام متحدہ کی قراردادوں اور کشمیری عوام کی امنگوں کے مطابق مسئلہ کشمیر کا پرامن حل اور غزہ کے عوام کے خلاف اسرائیلی جارحیت اور نسل کشی کے خاتمے پر امت کا اجتماعی موقف شامل ہیں۔
او آئی سی کے اجلاس میں پاکستان مسلم امہ کو درپیش چیلنجز کا اجتماعی حل تلاش کرنے کی ضرورت پر زور دے گا۔ بین الاقوامی برادری پر زور دیا جائے گا کہ وہ اسرائیل کو فلسطین میں گھنائونے جرائم کے ارتکاب سے روکنے اور اقوام متحدہ کی سلامتی کونسل سے فوری طور پر نمایاں جنگ بندی نافذ کرانے کے لیے اپنا موثر کردار ادا کرے۔
بین الاقوامی برادری اسرائیل پر زور دے کہ وہ غزہ کا محاصرہ ختم کرے، انسانی امداد میں سہولت فراہم کرے، شہریوں کو تحفظ اور مجرموں کو گرفتار کرے اور فلسطینیوں کی نسل کشی پر جوابدہ بنائے۔
واضح رہے وزرائے خارجہ کونسل کے اجلاس میں پاکستان کو متفقہ طور پر کانفرنس بیورو کا وائس چیئر بھی منتخب کیا گیا ہے۔
