نائیجیریا: فیول ٹینکر کی ٹرک کو ٹکر،دھماکے سے 48 افراد ہلاک
اردو انٹرنیشنل (مانیٹرنگ ڈیسک) نائیجیریا کی ہنگامی رسپانس ایجنسی کے مطابق ایک فیول ٹینکر دوسرے ٹرک سے ٹکرا گیا، جس کے نتیجے میں ایک دھماکہ ہوا،دھماکے کے نتیجے میں 48 افراد ہلاک ہو گئے۔
نائجر اسٹیٹ ایمرجنسی مینجمنٹ ایجنسی کے ڈائریکٹر جنرل عبداللہی بابا عرب نے اتوار کے روز بتایا کہ ایندھن کا ٹینکر شمالی وسطی نائجر ریاست میں اگائی کے علاقے میں جارہا تھا جب یہ واقعہ پیش آیا.
انہوں نے کہا کہ جائے حادثہ پرریسکیو آپریشن جاری ہیں۔
بابا عرب نے ابتدائی طور پر بتایا کہ 30 لاشیں ملی ہیں۔ لیکن بعد میں ایک بیان میں، انہوں نے کہا کہ متاثرین کی مزید 18 لاشیں ہیں جو تصادم میں جل کر ہلاک ہو گئے تھے۔ انہوں نے کہا کہ مرنے والوں کی اجتماعی تدفین کی گئی ہے۔
ابتدائی طور پر یہ واضح نہیں ہوسکا کہ کتنے افراد زخمی ہوئے۔
نائجر ریاست کے گورنر محمد باگو نے کہا کہ متاثرہ علاقے کے رہائشیوں کو پرسکون رہنا چاہیے اور سڑک استعمال کرنے والوں سے کہا کہ وہ “ہمیشہ محتاط رہیں اور جان و مال کی حفاظت کے لیے روڈ ٹریفک کے ضوابط کی پابندی کریں”۔
