اردو انٹرنیشنل (مانیٹرنگ ڈیسک) امریکی وزارت خارجہ کے بیان کے مطابق یوکرین کے دار الحکومت کئیف میں امریکی سفارت خانے کو بدھ کے روز ممکنہ طور پر ایک بڑے فضائی حملے کے بارے میں معلومات موصول ہوئی ہیں، اس کے سبب سفارت خانہ بند رکھا جائے گا۔
سفارت خانے کی ویب سائٹ پر جاری اس بیان میں مزید کہا گیا ہے کہ احتیاطی تدبیر کے پیش نظر سفارت خانہ بند رہے گا، سفارت خانے کے ملازمین کو ہدایت جاری کر دی گئی ہے کہ وہ اپنی جگہوں پر پناہ لے لیں … امریکی سفارت خانہ امریکی شہریوں کو نصیحت کرتا ہے کہ فضائی حملوں سے خبردار کرنے کے سائرن بجنے کی صورت میں وہ فوری طور پر پناہ لیں”۔
یہ انتباہ یوکرین کی جانب سے روس کے خلاف ‘ایٹکیمز’ امریکی میزائل استعمال کرنے کے ایک روز بعد سامنے آیا ہے۔
اس سے قبل روس ایک ماہ تک مغرب کو خبردار کرتا رہا ہے کہ یوکرین کو روس کے اندر تک حملوں کے لیے واشنگٹن کی جانب سے امریکی، برطانوی اور فرانسیسی ساخت کے ہتھیار استعمال کرنے کی اجازت دینے کے سنگین نتائج برآمد ہوں گے۔ مزید یہ کہ ماسکو اسے نیٹو اتحاد کے ان رکن ممالک کی یوکرین جنگ میں براہ راست شرکت شمار کرے گا۔
روسی صدر ولادی میر پوتین گذشتہ ماہ کہہ چکے ہیں کہ اگر یوکرین نے امریکی اسلحے کے ذریعے روس کے اندر گہرائی میں حملے کیے تو ماسکو اس کا جواب دے گا۔
