کراچی پورٹ آتشزدگی : کنٹینرز میں لگنے والی آگ پر قابو، نقصانات کا تخمینہ جاری

اردو انٹرنیشنل (مانیٹرنگ ڈیسک) ڈان نیوز کی خبر کے مطابق کراچی پورٹ پر واقع کراچی انٹرنیشنل کنٹینر ٹرمینل میں جمعے کی دوپہر لگنے والی شدید آگ کے نتیجے میں کم از کم 20 کنٹینرز مکمل طور پر جل کر تباہ ہو گئے، تاہم کوئی جانی نقصان رپورٹ نہیں ہوا۔ حکام کے مطابق واقعے کے وقت زیادہ تر مزدور جمعے کی نماز کے باعث موجود نہیں تھے، جس سے بڑے سانحے سے بچاؤ ممکن ہو سکا۔

ڈی آئی جی سید اسد رضا نے بتایا کہ ڈوکس پولیس کی حدود میں واقع ٹرمینل پر ایک کنٹینر میں آگ لگنے کی اطلاع ملتے ہی پولیس، ریسکیو اور فائر بریگیڈ کی ٹیمیں فوری طور پر موقع پر پہنچ گئیں۔ ان کے مطابق ابتدائی تحقیقات میں آگ کپڑوں سے بھرے کنٹینر میں شارٹ سرکٹ کے باعث لگنے کا انکشاف ہوا، جو بعد ازاں دیگر کنٹینرز تک پھیل گئی۔ آگ پر شام ساڑھے چار بجے کے قریب قابو پا لیا گیا، جبکہ کولنگ کا عمل جاری رہا۔

ریسکیو 1122 کے ترجمان حسان الحسیب خان کے مطابق کنٹرول روم کو دوپہر تقریباً 1 بج کر 45 منٹ پر ویسٹ وہارف گیٹ نمبر 20 کے قریب آگ لگنے کی اطلاع موصول ہوئی۔ ان کا کہنا تھا کہ ایک کنٹینر میں لگی آگ تیزی سے پھیلتے ہوئے 19 دیگر کنٹینرز کو بھی اپنی لپیٹ میں لے گئی، جن میں الیکٹرک، ڈرائی کیمیکل اور لیتھیم بیٹریاں، کپڑے اور دیگر سامان موجود تھا۔ تمام 20 کنٹینرز مکمل طور پر تباہ ہو گئے، جس سے بھاری مالی نقصان ہوا۔

ریسکیو حکام کے مطابق اس آگ کو بجھانے میں اس لیے مشکلات پیش آئیں کیونکہ یہ پانی کے بجائے خصوصی کیمیکل پاؤڈر سے قابو میں آتی ہے۔ فائر فائٹنگ کے دوران کے پی ٹی، ریسکیو 1122، کراچی میٹروپولیٹن کارپوریشن، پاکستان نیوی اور کراچی شپ یارڈ کے مجموعی طور پر 20 فائر ٹینڈرز نے حصہ لیا، جبکہ کراچی واٹر اینڈ سیوریج کارپوریشن نے واٹر ٹینکرز فراہم کیے۔

مزید خبریں : قومی سانحے کا خدشہ : کراچی کے گل پلازہ میں ہولناک آتشزدگی، ہلاکتوں کی تعداد 14 ہو گئی، 70 سے زائد افراد لاپتا

کراچی پورٹ ٹرسٹ کے ترجمان شارق امین فاروقی کے مطابق فوری اور مربوط کارروائی کے باعث آگ کو مزید پھیلنے سے روک لیا گیا اور بندرگاہ کے بنیادی انفرااسٹرکچر کو محفوظ رکھا گیا۔

دریں اثنا وفاقی وزیر برائے بحری امور محمد جنید انور چوہدری نے واقعے کا نوٹس لیتے ہوئے تحقیقات کے لیے انکوائری کمیٹی قائم کر دی ہے، جو آگ لگنے کی وجوہات اور ذمہ داری کا تعین کرے گی۔ وزارت بحری امور کے مطابق کے آئی سی ٹی ایک نجی ٹرمینل ہے اور حفاظتی انتظامات کی بنیادی ذمہ داری اس کی انتظامیہ پر عائد ہوتی ہے۔ حکام کا کہنا ہے کہ مالی نقصانات اور آگ کی حتمی وجہ جاننے کے لیے تحقیقات جاری ہیں۔