اردو انٹرنیشنل (اسپورٹس ویب ڈیسک) تفصیلات کے مطابق ترابزونسپور کے خلاف فینرباہس کی ڈرامائی جیت کے بعد، ہاؤزے مورینہو کو ان کے رویے اور میچ کے بعد دیے گئے تبصروں کی وجہ سے ایک میچ کی پابندی اور 15,000 پاؤنڈ کا جرمانہ ہوا۔
جب صوفیان امرابٹ نے آخری لمحات میں گول کیا، جس سے فینرباہس کو 3-2 سے جیت ملی، تو چیلسی اور مانچسٹر یونائیٹڈ کے سابق مینیجر مورینہو نے جوش میں پچ کی طرف دوڑتے ہوئے گھٹنوں کے بل پھسلنے کی کوشش کی۔ لیکن میچ کے بعد، انہوں نے ترکی میں ریفری کے معیار پر تنقید کی اور میچ آفیشلز کی غیر جانبداری پر سوال اٹھائے۔
ترک فٹ بال فیڈریشن نے اپنے بیان میں کہا کہ مورینہو کے یہ تبصرے کھیل کی اخلاقیات اور منصفانہ کھیل کے اصولوں کے خلاف ہیں اور اس سے ترکی میں فٹ بال کی ساکھ کو نقصان پہنچ رہا ہے۔ فیڈریشن نے یہ بھی کہا کہ مورینہو کے بیانات کا مقصد ریفری اور میچ آفیشلز کی غیر جانبداری پر شک پیدا کرنا تھا۔
تاہم یہ میچ تنازعات سے بھرپور تھا۔ مورینہو اس بات پر ناراض تھے کہ ترابزونسپور کو ویڈیو اسسٹنٹ ریفری (وی اے آر) کے فیصلوں کے بعد دو پنالٹیز دی گئیں۔ ان کا یہ بھی کہنا تھا کہ ان کی ٹیم کو بھی امرابٹ کے آخری گول سے پہلے پنالٹی ملنی چاہیے تھی۔
