اسرائیل کا جبالیہ کیمپ کنٹرول کرنے کا دعویٰ،24 گھنٹوں میں 100 فلسطینی شہید
اردو انٹرنیشنل (مانیٹرنگ ڈیسک) غزہ میں 24 گھنٹوں کے دوران اسرائیلی فوج نے مزید 100 فلسطینیوں کو شہید کردیا ہے، 7 اکتوبر سے شہید ہونے والے فلسطینیوں کی مجموعی تعداد 19 ہزار 600 سے تجاوز ہوگئی۔
غزہ کی وزارت صحت کا کہنا ہے کہ صرف ایک دن میں غزہ میں اسرائیلی حملوں میں تقریباً 100 فلسطینی شہید اور سینکڑوں زخمی ہوئے ہیں۔
دوسری جانب اسرائیلی فوج نے جبالیہ کیمپ کا مکمل کنٹرول حاصل کرنے کا دعویٰ کیا ہے، جبکہ یونیسیف نے خوراک اور صاف پانی نہ ملنے کی صورت میں تباہ کن صورت حال سے خبر دار کردیا ہے۔
اقوام متحدہ کی سلامتی کونسل میں اسرائیل اور حماس کے درمیان جنگ کو روکنے کے لیے مسودہ قرارداد پر ووٹنگ موخر کر دی گئی ہے، متحدہ عرب امارات (یو اے ای) کی طرف سے تیار کردہ قرارداد پر ووٹنگ پیر (18 دسمبر) کو ہونی تھی۔
الجزیرہ کی رپورٹ کے مطابق اقوام متحدہ کی سلامتی کونسل میں مسودہ قرارداد پر ووٹنگ آج (20 دسمبر) متوقع ہے۔
اسرائیل اور امریکا سلامتی کونسل کی قرارداد میں ’جنگ بندی‘ کی اصطلاح استعمال کرنے کے مخالف ہیں۔
اس کے علاوہ اسرائیل کا کہنا ہے کہ وہ مزید قیدیوں کی رہائی کے بدلے ایک اور فائر بندی پر راضی ہے جبکہ دوسری جانب قیدیوں کی رہائی پر بات چیت کےلیے حماس کے سربراہ ہنیہ کا آج مصر کے دورے کا امکان ہے
