اسحاق ڈار کی علی لاریجانی سے ملاقات،پاکستان، ایران کا علاقائی تعاون بڑھانے پر اتفاق
اردو انٹرنیشنل (مانیٹرنگ ڈیسک) ڈان نیوز کے مطابق دفتر خارجہ (ایف او) نے بتایا کہ نائب وزیراعظم اسحاق ڈار نے منگل کے روز ایران کی سپریم نیشنل سیکیورٹی کونسل کے سیکریٹری علی لاریجانی سے ملاقات کی، جس میں دونوں رہنماؤں نے علاقائی اور بین الاقوامی معاملات پر باہمی مفاد کے لیے تعاون بڑھانے کے عزم کا اعادہ کیا ۔
ایف او کے مطابق دونوں فریقین نے اسلام آباد اور تہران کے درمیان متعدد شعبوں میں دوطرفہ تعلقات کو مزید گہرا کرنے پر بھی اتفاق کیا۔لاریجانی پیر کے روز پاکستان پہنچے تھے اور اپنے دورے کے دوران وہ پاکستان کی سیاسی اور عسکری قیادت سے ملاقاتیں کریں گے۔
ان کا یہ دورہ گزشتہ ماہ ایرانی پارلیمنٹ کے اسپیکر باقر قالیباف کے اسلام آباد کے دورے کے بعد، چند ہفتوں کے اندر اندر ایران کے دوسرے اعلیٰ سطح کے وفد کی آمد ہے۔
پاکستان پہنچنے سے قبل ایکس پر جاری بیان میں لاریجانی نے کہا ایران اور پاکستان خطے میں دیرپا امن کو یقینی بنانے والے دو اہم اور مؤثر ممالک ہیں اور ہم ہمیشہ خطے کے ممالک کے درمیان بھائی چارے کے تعلقات کو بڑی اہمیت دیتے ہیں۔
انہوں نے مزید کہا کہ ایرانی عوام کبھی نہیں بھولیں گے کہ جون میں ایران اور اسرائیل کے درمیان 12 روزہ جنگ کے دوران پاکستانی عوام نے ان کا ساتھ دیا۔دوسری جانب پاکستان میں ایرانی سفیر ڈاکٹر رضا امیری مقدم نے ایکس پر اپنے بیان میں اس دورے کو “بے مثال” قرار دیا۔
انہوں نے کہا یہ تاریخی سنگِ میل ایک ایسے اہم موڑ کی نمائندگی کرتا ہے جہاں ہمارے دونوں برادر ممالک کے پہلے سے مضبوط اور آزمودہ تعلقات ایک نئے اسٹریٹجک مرحلے میں داخل ہونے والے ہیں۔
تیزی سے بدلتی ہوئی عالمی صورتحال اور خطے میں ابھرتی ہوئی نئی جہتوں کے تناظر میں، ہمارے دوطرفہ تعلقات کو مزید مضبوط بنانے اور اس میں حکمتِ عملی شامل کرنے کی ضرورت پہلے سے کہیں زیادہ ہے اور یہ اہم دورہ اس مقصد کے حصول میں ایک معنی خیز کردار ادا کرے گا۔
