سائفر کیس میں عمران خان ،شاہ محمود قریشی کیخلاف 14 سال قید یا سزائے موت کا مطالبہ کرینگے:اسپیشل پراسیکوٹر
اردو انٹرنیشنل (مانیٹرنگ ڈیسک) سائفر کیس میں اسپیشل پراسیکوٹر رضوان عباسی کا کہنا ہے کہ استغاثہ ٹرائل کورٹ میںآ فیشل سیکرٹ ایکٹ کے تحت عمران خان اور شاہ محمود قریشی کے خلاف زیادہ سے ز یادہ سزا یعنی 14 سال قید یا پھر سزائے موت کا مطالبہ کرے گا۔
اسپیشل پراسیکوٹر رضوان عباسی نے نجی ٹی وی کے پروگرام میں سینئر صحافی انصار عباسی سے گفتگو کے دوران کہا کہ جن افسران نے گواہی دی ہے اس سے معلوم ہوتا ہے کہ سائفر کیس کی وجہ سے پاک امریکا تعلقات متاثر ہوئے اور پاکستان کے مفاد کے خلاف اقدام ہوا اور اس سے پاکستان کے دشمن ممالک کو فائدہ پہنچا۔
استغاثہ کے پاس وزارت خارجہ کے تین سینئر افسران سہیل محمود، فیصل ترمذی اور اسد مجید کی گواہی کی بنیاد پر کافی شواہد موجود ہیں جن کے تحت عمران خان اور شاہ محمود قریشی کو زیادہ سے زیادہ سزا دلوائی جا سکتی ہے۔
انہوں نے کہا کہ استغاثہ کے اہم گواہوں میں اس وقت کے سیکریٹری خارجہ سہیل محمود، اس وقت کے پاکستانی سفیر برائے امریکا اسد مجید اور اس وقت کے ایڈیشنل سیکریٹری خارجہ فیصل ترمذی (جو اِس وقت متحدہ عرب امارات میں پاکستانی سفیر ہیں) شامل ہیں۔
ان کا کہنا تھا کہ آفیشل سیکرٹ ایکٹ کے سیکشن 5(3) کی شق (b) کے تحت سزا 14 سال قید یا سزائے موت ہے۔ واضح رہے کہ بانی پی ٹی آئی عمران خان اور سابق وزیر خارجہ شاہ محمود قریشی کیخلاف آفیشل سیکرٹ ایکٹ کے تحت مقدمہ درج کیا گیا تھا اور راولپنڈی کی اڈیالہ جیل میں اس کیس کی سماعت آفیشل سیکرٹ ایکٹ عدالت کے جج ابوالحسنات ذوالقرنین کررہے ہیں۔ سپریم کورٹ نے گزشتہ سماعت پر سائفر کیس میں بانی پاکستان تحریک انصاف عمران خان اور وائس چیئرمین پی ٹی آئی کی درخواست ضمانت منظور کی تھی۔
سائفر کیس میں عمران خان اور شاہ محمود قریشی کی درخواست ضمانت پر سماعت قائم مقام چیف جسٹس سردار طارق مسعود کی سربراہی میں 3 رکنی بینچ نے کیس کی سماعت کی تھی، جسٹس منصور علی شاہ اور جسٹس اطہر من اللہ بینچ کا حصہ تھے۔ سائفر کیس میں عمران خان کے وکیل صفائی سلمان صفدر نے سپریم کورٹ کی جانب سے عمران خان اور شاہ محمود قریشی کو ضمانت پر رہا کرنے کے فیصلے کے بعد کہا تھا کہ سپریم کورٹ کے آرڈر کی وجہ سے سائفر کیس کے غبارے سے ہوا نکل گئی ہے۔
انہوں نے کہا تھا کہ سپریم کورٹ کے فیصلے کے بعد استغاثہ کیلئے ٹرائل کورٹ میں کیس ثابت کرنا مشکل ہوگا، سائفر کیس کے ذریعے رائی کا پہاڑ بنایا گیا تھا۔
